काठमाडौँ। गाजामा युद्ध सुरु भएको तीन वर्षपछि इजरायलमा आउँदो मङ्गलबार हुने निर्वाचनमा प्रधानमन्त्री बेन्जामिन नेतान्याहु र पूर्व सैनिक प्रमुख गदी इसेनकोटबीच सत्ताका लागि तीव्र प्रतिस्पर्धा हुने देखिएको छ।
सर्वेक्षणहरूले नेतान्याहुको लिकुड पार्टी र इसेनकोट नेतृत्वको मध्यमार्गी याशर पार्टीबीच कडा टक्कर संकेत गरेका छन्। एक सय २० सदस्यीय नेसेट (इजरायली संसद्) मा सरकार बनाउन कम्तीमा ६१ सिट आवश्यक पर्ने हुँदा चुनावपछि गठबन्धन निर्माण नै निर्णायक हुनेछ।
७७ वर्षीय नेतान्याहु इजरायलकै सबैभन्दा लामो समय प्रधानमन्त्री बनेका नेता हुन्। समर्थकहरूले उनको सुरक्षा र आर्थिक क्षेत्रको अनुभव तथा अमेरिकी राष्ट्रपति डोनाल्ड ट्रम्पसँगको निकट सम्बन्धलाई उनका बलिया पक्ष मान्छन्। तर आलोचकहरूले सन् २०२३ अक्टोबर ७ को हमास आक्रमणअघि सुरक्षा चुक्न दिएको र त्यसपछिको युद्ध सञ्चालन असफल भएको आरोप लगाएका छन्। उनले युद्ध अपराध, मानवताविरुद्धका अपराध तथा ठगी र घुससम्बन्धी आरोप अस्वीकार गर्दै आएका छन्।
६६ वर्षीय इसेनकोट मध्यमार्गी विकल्पका रूपमा उभिएका छन्। गाजाको युद्धमा उनका छोरा र दुई भतिजाको ज्यान गएको थियो। नेतान्याहुको युद्ध मन्त्रिपरिषद्मा काम गरेका उनले स्पष्ट रणनीति नभएको भन्दै आठ महिनापछि राजीनामा दिएका थिए। सुरक्षा नीतिमा भने उनी कडा मानिन्छन्।
पूर्वप्रधानमन्त्री नाफ्ताली बेनेट मध्यमार्गी नेता यायर लापिडसँग गठबन्धनमा छन्। उनी प्यालेस्टिनी स्वतन्त्रताको विरोधी र पश्चिमी किनारमा यहुदी बस्ती विस्तारका समर्थक हुन्। सन् २०२१ मा उनले वामपन्थी तथा अरब दलको समर्थनमा गठबन्धन सरकारको नेतृत्व गर्दै प्रधानमन्त्रीको जिम्मेवारी सम्हालेका थिए।
राष्ट्रिय सुरक्षा मन्त्री इटामार बेन–गभिर अति दक्षिणपन्थी नेता हुन्। प्यालेस्टिनीहरूलाई गाजाबाट अन्यत्र सार्ने र त्यहाँ यहुदी बस्ती पुनःस्थापना गर्ने प्रस्तावका कारण उनी विवादमा छन्। अघिल्लो निर्वाचनमा उनको पार्टीको राम्रो प्रदर्शनपछि नेतान्याहुको गठबन्धनमा दक्षिणपन्थी प्रभाव बढेको थियो।
त्यस्तै, ५२ वर्षीय मन्सुर अब्बास अरब नेतृत्वको राम पार्टीका नेता हुन्। उनले अरब समुदायमा अपराध नियन्त्रणजस्ता स्थानीय मुद्दालाई प्राथमिकता दिँदै आएका छन्। सन् २०२१ मा उनको पार्टी इजरायली सरकारमा सहभागी हुने पहिलो अरब नेतृत्वको दल बनेको थियो।
