काठमाडौँ — पूर्वराष्ट्रपति विद्यादेवी भण्डारी बिहीबार चीन प्रस्थान गरेकी छन्। चीनको स्योङआनमा यही अक्टोबर २३ देखि २५ सम्म आयोजना हुने ‘ग्लोबल गभर्नेन्स फोरम’ मा सहभागी हुन उनी आज त्यसतर्फ प्रस्थान गरेकी हुन्।
‘परिवर्तनशील विश्वमा विश्वास र सहकार्यको पुनर्निर्माण’ भन्ने मूल विषयवस्तुमा केन्द्रित रहने उक्त सम्मेलनलाई भण्डारीले विशिष्ट अतिथिका रूपमा सम्बोधन गर्ने कार्यक्रम रहेको उनको सचिवालयले जनाएको छ।
सम्मेलनअन्तर्गत अक्टोबर २४ र २५ मा विभिन्न विषयमा समानान्तर सत्र, प्यानल छलफल तथा गोलमेच बैठक आयोजना गरिनेछ। फोरममा संयुक्त राष्ट्रसङ्घ केन्द्रित अन्तरराष्ट्रिय प्रणालीको संरक्षण, विश्व शान्ति र शान्ति स्थापना कार्यका लागि आवश्यक सुधार, बहुपक्षीयताको प्रवर्द्धन, अन्तरराष्ट्रिय सम्बन्धमा विकासशील मुलुकहरूको बढ्दो भूमिका तथा अन्तरराष्ट्रिय व्यापारमा ‘ग्लोबल साउथ’ का देशहरूको भूमिकामाथि छलफल हुनेछ।
त्यसैगरी जलवायु परिवर्तन र त्यसका असर, हरित तथा न्यून कार्बन विकास, दिगो विकास, कृत्रिम बौद्धिकता र साइबर स्पेसलगायत विषयमा पनि बहस हुने बताइएको छ।
पूर्वराष्ट्रपति भण्डारी आगामी सोमबार स्वदेश फर्कने कार्यक्रम छ।
