अमेरिकी सरकारले इरानको आणविक कार्यक्रमसँग जोडिएका गतिविधिबारे जानकारी दिने व्यक्तिलाई दुई करोड अमेरिकी डलरसम्म पुरस्कार दिने घोषणा गरेको छ।
अमेरिकी विदेश मन्त्रालयअन्तर्गत सञ्चालित ‘रिवाड्र्स फर जस्टिस’ कार्यक्रमले सामाजिक सञ्जाल एक्समार्फत यो प्रस्ताव सार्वजनिक गरेको हो। कार्यक्रमका अनुसार इरानका आणविक केन्द्र, त्यसमा प्रयोग हुने उपकरण, सम्बन्धित वैज्ञानिक तथा कार्यक्रमसँग आबद्ध अन्य व्यक्तिबारे सूचना दिने व्यक्ति पुरस्कारका लागि योग्य हुनेछन्।
आणविक सामग्रीको आपूर्ति र एक ठाउँबाट अर्को ठाउँमा सार्ने काममा संलग्न व्यक्तिबारे जानकारी दिनेहरूले पनि पुरस्कार पाउन सक्ने जनाइएको छ। सूचना दिने व्यक्तिको सुरक्षालाई ध्यानमा राख्दै आवश्यक परेमा उसलाई अर्को स्थानमा सारेर बसोबासको व्यवस्था गर्न सकिने विकल्पसमेत प्रस्तावमा समेटिएको छ।
अमेरिकी विदेश मन्त्रालयले इरानले आणविक हतियार बनाउने कुनै पनि प्रयासको विरोधमा वासिङ्टन दृढ रहेको बताएको छ। इरानको आणविक कार्यक्रमलाई लिएर अमेरिका र इरानबीच लामो समयदेखि तनाव रहँदै आएको छ, र पछिल्लो प्रस्ताव त्यही तनावकै बीच आएको हो।
