चिकित्सा शिक्षा सुधारका अभियानकर्ता डा. गोविन्द केसीले बिहीबार साँझदेखि फेरि सत्याग्रह थाल्ने घोषणा गरेका छन्। इलामस्थित नारायण मन्दिरमा साँझ ५ बजेदेखि सत्याग्रह सुरु हुने जनाइएको छ। सरकारले थपिएको समयसीमाभित्र पनि आफ्ना माग सम्बोधन नगरेपछि उनले आन्दोलनको बाटो रोजेको बताइएको छ।
यसपटकको असन्तुष्टिको केन्द्रमा चिकित्सा शिक्षा आयोगको पछिल्लो निर्णय रहेको छ। न्यूनतम पूर्वाधार र आवश्यक जनशक्ति नपुगीकनै चिकित्सा शिक्षा सञ्चालनको अनुमति दिइएको र शिक्षण संस्थामा सिट सङ्ख्या बढाइएको उनको आरोप छ। मापदण्ड नपुगेका संस्थालाई दिइएको सुविधा फिर्ता लिनुपर्ने उनको माग छ।
गेटास्थित सहिद दशरथ चन्द स्वास्थ्य विज्ञान विश्वविद्यालयमा एमबीबीएस र नर्सिङ कार्यक्रम सञ्चालनको अनुमति खारेज गर्नुपर्ने माग उनले अघि सारेका छन्। गेटा शिक्षण अस्पताललाई पूर्ण क्षमतामा सञ्चालन गर्नुपर्ने र पूर्वाधार, जनशक्ति तथा कानुनी मापदण्ड पूरा भएपछि मात्र शैक्षिक कार्यक्रम सुरु गर्नुपर्ने उनको भनाइ छ। आयोगका उपाध्यक्षको नियुक्ति प्रक्रिया, शैक्षिक योग्यता, व्यावसायिक अनुभव र स्वार्थ बाझिने सम्भावनाबारे निष्पक्ष छानबिन हुनुपर्ने माग पनि गरिएको छ। छानबिन अवधिभर आयोगका उपाध्यक्ष र विश्वविद्यालयका उपकुलपति तथा रजिस्ट्रार निलम्बनमा रहनुपर्ने र दोषी देखिए कारबाही हुनुपर्ने उनको माग छ।
सरकारी तथा सार्वजनिक लगानीका संस्थामा ७५ प्रतिशत छात्रवृत्तिको व्यवस्था कडाइका साथ लागू गर्नुपर्ने र निजी मेडिकल कलेजको हितमा छात्रवृत्ति कटौती गर्ने प्रयास रोक्नुपर्ने माग पनि सत्याग्रहमा समेटिएको छ। साउन ११ गते सरकारसँग भएको सहमति झन्डै तीन महिनामा पनि कार्यान्वयन नभएको उनको गुनासो छ। इलाम, उदयपुर र डडेल्धुरामा सरकारी मेडिकल कलेज वा स्वास्थ्य विज्ञान प्रतिष्ठान स्थापनाको प्रक्रिया अघि बढाउनुपर्ने र बर्दिबास मेडिकल कलेजको निर्माण आयोजना खारेज गर्ने निर्णय उल्ट्याएर निर्माण सुरु गर्नुपर्ने माग पनि उनले राखेका छन्। माग पूरा नभए उत्पन्न परिस्थितिको जिम्मेवारी सरकारले लिनुपर्ने चेतावनी उनले दिएका छन्।
