काठमाडौं, ४ कात्तिक । बंगलादेश राष्ट्रिय टोलीका अलराउन्डर महेदी हसनले नेपाल प्रिमियर लिग (एनपीएल) को तेस्रो संस्करण पोखरा एभेन्जर्सबाट खेल्ने भएका छन्। टोलीले बुधबार महेदीलाई आधिकारिक रूपमा अनुबन्ध गरेको घोषणा गरेको हो।
३१ वर्षीय महेदी दायाँहाते ब्याटर तथा दायाँहाते अफ स्पिन बलर हुन्। उनी यस समय अन्तर्राष्ट्रिय क्रिकेट परिषद् (आईसीसी) को टी–२० अन्तर्राष्ट्रिय बलिङ वरीयतामा आठौं स्थानमा छन्।
महेदीले बंगलादेशका लागि ७८ वटा टी–२० अन्तर्राष्ट्रिय खेल खेलेका छन्, जसमा उनले ४९४ रन बनाउनुका साथै ७८ विकेट लिएका छन्। समग्र टी–२० क्रिकेटमा उनको अभिलेख झनै बलियो छ — २१० खेलमा २ हजार १३१ रन र १९७ विकेट।
पोखरा एभेन्जर्सले महेदीको अलराउन्ड क्षमताले टोलीलाई थप सन्तुलित र बलियो बनाउने विश्वास व्यक्त गरेको छ। यसअघि टोलीले बंगलादेशकै स्टार अलराउन्डर शाकिब अल हसन र श्रीलंकाका चमिका करुणारत्नेलाई समेत अनुबन्ध गरिसकेको छ।
एनपीएलको तेस्रो संस्करण कात्तिक ९ गतेदेखि सुरु हुँदैछ।
