भारतीय जनता पार्टीकी सांसद एवम् अभिनेत्री कंगना रनौत १७ वर्षपछि हरर चलचित्रमा फर्किने भएकी छन्। ‘क्वीन २’ आउने निश्चित भइसकेका बेला उनी हरर जनरामा पनि पुनरागमन गर्ने भएकी हुन्। अभिनेता राणा दग्गुबातीले दिल्लीमा आयोजित ‘हररकन इन्डिया २०२६’ कार्यक्रममा आफ्नो आगामी चलचित्र ‘स्केरी पिक्चर’ को घोषणा गरेका हुन्।
तेलगु चलचित्रका निर्माता एवम् अभिनेता रवि बाबुले यस चलचित्रको निर्देशन गर्नेछन्। कंगना रनौत मुख्य भूमिकामा देखिनेछिन्। कंगनाले आइतबार आफ्नो इन्स्टाग्राम अकाउन्टमार्फत पनि चलचित्रबारे जानकारी साझा गरेकी छन्। राणाको प्रोडक्सन हाउसका तर्फबाट चलचित्रबारे अझै औपचारिक घोषणा हुन बाँकी छ।
कार्यक्रममा राणाले भने, ‘यो एउटा हरर चलचित्र हो। यसलाई मेरा साथी रवि बाबुले बनाइरहेका छन्।’ तेलगुमा धेरै हन्टेड चलचित्र बनाएका रवि बाबुका लागि हिन्दीमा निर्देशकका रूपमा यो पहिलो फिचर चलचित्र हुनेछ। चलचित्रको शीर्षक पहिलोपटक यही कार्यक्रममा घोषणा गरिएको र हिन्दी मिडियालाई पनि अहिलेसम्म यसबारे जानकारी नभएको राणाले बताए।
कंगनाले पछिल्लोपटक सन् २००९ मा रिलिज भएको हरर चलचित्र ‘राज २’ मा काम गरेकी थिइन्। इमरान हाश्मी पनि रहेको उक्त चलचित्र मोहित सूरीले निर्देशन गरेका थिए र बक्स अफिसमा हिट भएको थियो।
