मुगुबाट जुम्लातर्फ आउँदै गरेको बोलेरो जीप दुर्घटना हुँदा एक जनाको ज्यान गएको छ भने छ जना घाइते भएका छन्। शनिबार साँझ कनकासुन्दरी गाउँपालिका–१ को चौथामा क १ ज ००५४ नम्बरको जीप दुर्घटनामा परेको जिल्ला प्रहरी कार्यालय जुम्लाले जनाएको छ।
दुर्घटनामा परी रुकुम पूर्वको उत्तरगंगा गाउँपालिका–१ स्थायी घर भई हाल कनकासुन्दरी गाउँपालिकामा बस्दै आएका अन्दाजी ४२ वर्षीय सुरज पुन मगरको घटनास्थलमै मृत्यु भएको हो। उनको मृत्युबारे जानकारी जिल्ला प्रहरी कार्यालय जुम्लाका प्रहरी नायब उपरीक्षक चिरञ्जीवी दाहालले दिएका हुन्।
घाइते भएका छ जनालाई कनकासुन्दरी गाउँपालिकाको एम्बुलेन्समार्फत कर्णाली स्वास्थ्य विज्ञान प्रतिष्ठानमा लगेर उपचार सुरु गरिएको छ। प्रहरीका अनुसार घाइते सबैको अवस्था सामान्य छ। उनीहरूको उपचार प्रतिष्ठानमा भइरहेको छ।
दुर्घटनामा परेको जीपमा १६ जना यात्रु सवार रहेको प्रहरीले जनाएको छ। १६ जनामध्ये एक जनाको मृत्यु भएको छ भने छ जना घाइते भएका छन्। घटनाको कारणबारे थप अनुसन्धान भइरहेको छ। प्रहरीले छानबिनपछि मात्र दुर्घटनाको विस्तृत विवरण आउने बताएको छ।
