नेपाली कांग्रेसका सभापति गगन थापाले सिँचाइ विभागका महानिर्देशकसहितका कर्मचारीलाई प्रहरी नियन्त्रणमा लिएर दबाब दिइएको घटनाप्रति गम्भीर आपत्ति जनाएका छन्। आइतबार पार्टी केन्द्रीय कार्यालय सानेपामा आयोजित पत्रकार सम्मेलनमा बोल्दै उनले कर्मचारीबाट गल्ती भए कानुनी प्रक्रिया र स्थापित निकायमार्फत छानबिन हुनुपर्ने बताए।
सिँचाइ विभागका महानिर्देशक दिनेश रजौरिया र अर्को आयोजनाका एक कर्मचारीलाई प्रहरीले नियन्त्रणमा लिएर दबाब दिएको घटना बाहिर आएको थापाले बताए। यस्तो कदम अत्यन्तै आपत्तिजनक भएको उनको भनाइ थियो। कुनै राष्ट्रसेवकले नियमविपरीत काम गरे त्यसबारे अध्ययन तथा छानबिन गर्ने राष्ट्रिय सतर्कता केन्द्र र अख्तियार दुरुपयोग अनुसन्धान आयोगजस्ता निकाय मुलुकमा रहेको उनले स्मरण गराए।
ती निकायलाई छलेर हुकुमी शैली चलाउन नमिल्ने थापाको भनाइ थियो। ‘कर्मचारीले कुनै गल्ती गरे प्रधानमन्त्री कार्यालयमा बोलाएर थुन्ने होइन,’ उनले भने, ‘सरोकारवाला आधिकारिक निकायबाट विधिसम्मत अनुसन्धान अगाडि बढाउने हो। अनुसन्धानबाट यदि गल्ती गरेको ठहरिए कानुनबमोजिम कारबाही गर्ने हो।’
राज्यका आधिकारिक संयन्त्रलाई बाइपास गरेर आतङ्कित बनाउने शैली लोकतान्त्रिक हुन नसक्ने उनले बताए। सरकारले विधिको शासन, प्रशासनिक मर्यादा र स्थापित कानुनी संयन्त्रहरूको खिल्ली उडाउँदै स्वेच्छाचारी र गैरकानुनी बाटो रोजेको आरोपसमेत उनले लगाए।
