गाजामा जारी आक्रमणका कारण बालबालिकाले भोग्नुपरेको पीडा अझै गहिरिँदै गएको मानवअधिकारवादी संस्थाले जनाएको छ। यूरो–मेडिटेरेनियन ह्युमन राइट्सका अनुगमनकर्ताका अनुसार इजरायली आक्रमणले यही अक्टोबर ९ सम्ममा गाजामा एक हजार एक सय ३४ जना बालबालिकालाई अपाङ्ग बनाएको छ। उपचार, पुनःस्थापना र आवश्यक उपकरणमाथि लगाइएको प्रतिबन्धले ती बालबालिकाको पीडा झन् बढाएको संस्थाको भनाइ छ।
संस्थाले अपाङ्गता भएका बालबालिकालाई दीर्घकालीन चिकित्सा हेरचाह, पुनःस्थापना र मनोवैज्ञानिक सहयोग अपरिहार्य भएको बताएको छ। परिवारहरूले पनि आवास, आय र आधारभूत सेवाको अभावको बोझ बोक्नुपरेको उल्लेख गरिएको छ। व्यवहारमा अवरोध पुर्याउनुलाई गाजाका प्यालेस्टिनीहरूविरुद्धको नरसंहारको एउटा हिस्सा भएको संस्थाले दाबी गरेको छ।
गत मे महिनामा सार्वजनिक भएको विश्व स्वास्थ्य सङ्गठनको प्रतिवेदनलाई उद्धृत गर्दै यूरो–मेडले सन् २०२४ को सेप्टेम्बरदेखि सन् २०२६ को मेसम्म अङ्गविच्छेदनको मूल्याङ्कन गरिएका करिब दुई हजार तीन सय जनामध्ये करिब पाँच सय जनाले मात्र पुनःस्थापना पाएको जनाएको छ। बिरामीको अवस्था र चिकित्सा निकासीमा जारी प्रतिबन्धले बालबालिकालाई गाजामा उपलब्ध नभएका विशेष उपचारबाट वञ्चित गरेको संस्थाको भनाइ छ। यसले उनीहरूको पीडा लम्ब्याउनुका साथै स्वतन्त्रता पनि सीमित गरेको छ।
