चितवनमा फुलेको सयपत्री र मखमली फूल अब विदेशका बजारसम्म पुगेको छ। पूर्वी चितवनको कालिका नगरपालिका–पदमपुरका चार दाजुभाइले उत्पादन गरेका माला र फूलका थुङ्गा बेलायत, हङ्कङ र दुबई निर्यात हुन थालेका छन्।
परिवारका गोविन्द बाँस्तोलाका अनुसार हङ्कङमा तीन हजार सयपत्री र दुई हजार मखमलीका माला पठाइएको छ। त्यसबाहेक विशिष्ट व्यक्तिका लागि तयार गरिएका पाँच सय माला र पाँच सय किलो सयपत्री फूलका थुङ्गा पनि हङ्कङ गएका छन्। दुबईमा एक हजार सयपत्री माला र एक हजार किलो फूलका थुङ्गा पठाइएको छ भने बेलायतमा पाँच सय मखमली माला पुगेका छन्। ती देशमा रहेका नेपाली व्यवसायीले चितवनबाट माला किनेर लगेका हुन्।
सात वर्षअघि पाँच कठ्ठा जमिनबाट सुरु भएको यो व्यवसाय अहिले १० बिघामा फैलिएको छ। पाँच बिघामा तिहारलाई लक्षित गरी फूल लगाइएको छ भने बाँकी जमिनमा बेमौसमी फूल उत्पादन हुँदै आएको छ। एउटा माला नेपाली बजारमा ८० रुपैयाँ र विदेशमा १०० रुपैयाँमा बिक्री हुने गरेको छ।
चार दाजुभाइमध्ये तीन जनाले विभिन्न विषयमा स्नातकोत्तर गरेका छन्। गोविन्द चितवन मेडिकल कलेजमा अध्यापन गर्छन्। कोरोना महामारीका कारण रोजगारी गुमेपछि सुरु गरिएको फूलखेतीबाट अहिले वार्षिक ७० देखि ८० लाख रुपैयाँसम्मको कारोबार हुने गरेको उनले बताए। विसं २०८० बाहेक अन्य वर्षमा फूलखेतीबाट राम्रो आम्दानी भएको उनको भनाइ छ।
यस वर्ष तिहारलाई लक्षित गरी पाँच बिघामा लगाइएको फूलबाट ३० देखि ४० हजार माला र पाँच सय किलो फूल उत्पादन गर्ने लक्ष्य राखिएको छ। अन्य समयमा मासिक छ हजारभन्दा बढी माला उत्पादन हुने गरेको छ। यस वर्षको तिहारमा २० देखि २५ जनालाई रोजगारी दिएर करिब २५ लाख रुपैयाँ आम्दानी गर्ने लक्ष्य रहेको बाँस्तोलाले बताए।
चितवनमा उत्पादित फूलको मुख्य बजार काठमाडौँ, पोखरा, हेटौँडा, बुटवल, धनगढी, नेपालगञ्ज र बागलुङलगायत सहर हुन्। उत्पादित फूलमध्ये करिब ४० प्रतिशत चितवनमै खपत हुने र बाँकी अन्य जिल्लामा बिक्रीका लागि पठाइने उनले जानकारी दिए।
