कोची — भारतको राजधानी नयाँ दिल्लीमा भएको प्रदर्शनपछि ककरोच जनता पार्टी (सीजेपी) ले केरलको कोचीमा विरोध प्रदर्शन गरेको छ। ‘जन्तर–मन्तर एट कोची’ नाम दिइएको कार्यक्रममा पार्टीका संस्थापक अभिजित दिपक सहभागी भए।
दिपकले सम्बोधनका क्रममा भारतीय निर्वाचन आयोगको काममाथि प्रश्न उठाए। उनले देशभर मतदाता सूचीबाट १३ करोडभन्दा बढी मतदाताको नाम हटाइएको दाबी गरे। उनका अनुसार यो संख्या कुल दर्ता मतदाताको करिब १३ देखि १४ प्रतिशत हो। यति ठूलो संख्यामा नाम हटाइँदा आगामी निर्वाचन निष्पक्ष हुने कुरामा शंका गर्नुपर्ने अवस्था आएको उनको भनाइ थियो।
नाम हटाउने काम कुनै एक राज्यमा सीमित नभई देशभर योजनाबद्ध रूपमा भइरहेको आरोप उनले लगाए। मतदाता सूचीमा भएको फेरबदल लोकतान्त्रिक प्रक्रियाका लागि गम्भीर चुनौती भएको भन्दै उनले मुख्य निर्वाचन आयुक्त ज्ञानेश कुमारको राजीनामा मागलाई समर्थन गरे।
प्रदर्शनका क्रममा आयोजित पत्रकार सम्मेलनमा अल इन्डिया स्टुडेन्ट्स एसोसिएसनकी राष्ट्रिय अध्यक्ष नेहा बोरा, एसएफआई नेत्री आइशी घोष, अल इन्डिया स्टुडेन्ट्स फेडेरेसनका राष्ट्रिय अध्यक्ष विराज देवाङ र अभिनेता प्रकाश राज उपस्थित थिए। दिपकले विगतमा राष्ट्रिय झण्डा फहराएकै कारण आफूलाई जेल पठाइएको स्मरण गर्दै आफूहरू गर्वका साथ झण्डा फहराइरहने बताए।
यसैबीच निर्वाचन आयोगले १३ करोड मतदाताको नाम हटाइएको दाबीलाई भ्रामक भनेको छ। आयोगका अनुसार उक्त संख्या अनुपस्थित रहेका, स्थायी रूपमा बसाइँ सरेका, मृत तथा दोहोरो दर्ता भएका मतदाताको हो। नाम छुटेका योग्य मतदाताले फारम–६ भरेर पुनः नाम दर्ता गराउन सक्ने आयोगले स्पष्ट पारेको छ। मतदाता सूचीको विषयमा भारतमा राजनीतिक दल र निर्वाचन आयोगबीच विवाद चर्किँदै गएको छ।
