झापा — भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले भूमिहीन तथा सुकुमवासीलाई जग्गाधनी पुर्जा दिने काममा भइरहेको ढिलाइप्रति असन्तुष्टि जनाउँदै काम छिटो गर्न निर्देशन दिएकी छन्।
जिल्ला प्रशासन कार्यालय झापामा सोमबार आयोजित छलफलमा मन्त्री रावलले जिल्ला भूमि समस्या समाधान समितिका पदाधिकारी, जिल्लाका १५ वटै स्थानीय तहका प्रमुख प्रशासकीय अधिकृत र भूमि शाखाका कर्मचारीसँग हालसम्मको प्रगतिबारे जानकारी लिइन्। उनले अहिलेसम्मको उपलब्धि सन्तोषजनक नरहेको बताइन्।
भूमिहीन दलित, भूमिहीन सुकुमवासी र अव्यवस्थित बसोबासी गरी हजारौँ नागरिकले धेरै अघि नै पुर्जा पाइसक्नुपर्ने भए पनि अपेक्षित परिणाम नआएको उनको भनाइ थियो। सरकारले भूमिसम्बन्धी समस्या सुल्झाउन अध्यादेशमार्फत नीतिगत सुधार गरिसकेको उल्लेख गर्दै उनले कानुन वा नीतिमा थप अड्चन भए सरकारले सहजीकरण गर्ने प्रतिबद्धता जनाइन्। प्रक्रियागत कारण देखाएर काम रोक्न नहुने भन्दै उनले परिणाम देखिने गरी अघि बढ्न निर्देशन दिइन्।
छलफलमा प्रतिनिधिसभा सदस्य प्रकाश पाठक, शम्भु सुस्केरा ढकाल र रमेश प्रसाईंले भूमिहीनको समस्या स्थायी रूपमा टुङ्ग्याउन पुर्जा वितरण छिटो गर्न सुझाव दिए। जनताको विश्वास फर्काउन राजनीतिक नेतृत्व र कर्मचारीतन्त्र दुवैले जिम्मेवारीपूर्वक काम गर्नुपर्ने उनीहरूको भनाइ थियो।
प्रमुख जिल्ला अधिकारी श्रवणकुमार पोखरेलले पुर्जा वितरणलाई तीव्रता दिने प्रतिबद्धता जनाउँदै थप जनशक्तिसहित टोली खटिइसकेको बताए। जिल्ला भूमि समस्या समाधान समितिका सदस्य सचिव एवं जिल्ला नापी कार्यालय झापाका प्रमुख शिवप्रसाद लम्सालका अनुसार जिल्लामा जग्गा प्राप्तिका लागि ६० हजार २०० भन्दा बढीले आवेदन दिएका छन् भने नयाँ समिति गठन भएयता ७४ जनाले मात्र जग्गाधनी पुर्जा पाएका छन्।
