नेपाली कांग्रेसभित्र समानान्तर गतिविधि चलाइरहेको देउवा पक्षले पूर्वसभापति शेरबहादुर देउवाको गृहजिल्ला डडेल्धुरामा जिल्ला अधिवेशन सुरु गरेको छ।
देउवा पक्षले पन्ध्रौं महाधिवेशनअन्तर्गत शनिबार क्षेत्रीय तथा आठौं जिल्ला अधिवेशन आयोजना गरेको हो। अधिवेशनले जिल्लाको नयाँ नेतृत्व छान्नुका साथै महाधिवेशन प्रतिनिधि पनि चयन गर्नेछ।
कांग्रेस डडेल्धुराका तत्कालीन सभापति भीमबहादुर साउद विशेष महाधिवेशनबाट छानिएको केन्द्रीय कार्यसमितिले आयोजना गरेको अधिवेशनमा सहभागी भएपछि देउवा पक्षले उपसभापति डिल्लीराज जोशीलाई संयोजकको जिम्मेवारी दिएको थियो। स्रोतका अनुसार अधिवेशनबाट जोशी नै जिल्ला सभापति बन्ने सम्भावना बलियो देखिएको छ।
अधिवेशन सुरु हुनुअघि देउवा पक्षका कार्यकर्ताले डडेल्धुरा बसपार्कदेखि निर्माण व्यवसायी संघको सभाहलसम्म बाजागाजासहित र्याली निकालेका थिए।
यसअघि उक्त पक्षले संखुवासभा, डोल्पा, हुम्ला, जुम्ला, मुगु, रुकुम पश्चिम, कालिकोट, डोटी, बैतडी, रोल्पा र दैलेखमा नयाँ नेतृत्व चयन गरिसकेको छ। १५ असोजबाट वडा अधिवेशन थालेको पक्षले १५ कात्तिकमा जिल्ला अधिवेशन गर्ने कार्यतालिका सार्वजनिक गरेको थियो।
