तिहार नजिकिँदै जाँदा दाङका फूल किसान अहिले बारीमा फुलेका सयपत्री टिपेर माला गाँस्नमा व्यस्त छन्। चाडपर्वको माग धान्न किसानहरू बिहानैदेखि बेलुकासम्म फूल टिप्ने र माला बनाउने काममा लागेका छन्।
घोराही उपमहानगरपालिका–१७ गैरागाउँमा रहेको डिभाइन एग्रो फार्मले माला बनाउने काम थालेको छ। कैलालीका दशरथ साउदले सञ्चालन गरेको यो फार्मले आठ वर्षदेखि घोराहीमा व्यावसायिक रूपमा फूल उत्पादन गर्दै आएको छ। यस वर्ष फार्मले गैरागाउँमा भाडामा लिएको एक बिघा जग्गामा पाँच प्रजातिका सयपत्री लगाएको छ भने घोराहीकै झिङ्नीमा थप दुई बिघामा पनि फूलखेती गरिएको छ।
फार्मले सयपत्री फूल प्रतिकिलो पाँच सय रुपैयाँमा बिक्री गरिरहेको छ भने एउटा मालाको मूल्य एक सयदेखि एक सय ५० रुपैयाँसम्म पर्छ। उत्पादन पर्याप्त भएकाले बुटवल, काठमाडौँ, भैरहवा र पोखरालगायतका सहरमा फूल पठाइने गरेको छ भने जिल्लाभित्रकै बिक्रीका लागि माला गाँस्ने काम भइरहेको छ।
घोराही–१४ झिगौराका लोकेन्द्र रोका मगर पनि माला बनाउन व्यस्त छन्। उनले सञ्चालन गरेको जलजला पुष्पखेती फार्मबाट जिल्लाभित्र र बाहिरबाट समेत फूलको माग आउने गरे पनि पहिलो प्राथमिकता जिल्लालाई नै दिने गरेको उनले बताए। दुई बिघा भाडाको जग्गामा फूलखेती गरेका रोकाले घोराही–५ धर्ना र घोराही–१६ तेरौटेमा समेत फूल लगाएका छन्।
रोजगारीका लागि सात वर्ष कतारमा बिताएका रोकाले दशैँ तिहारलगायतका पर्व र शुभकार्यमा फूलको माग देखेपछि फूलखेती सुरु गरेका थिए। त्यतिबेला दाङमा व्यावसायिक फूलखेती नभएको र काठमाडौँमा देखेको अभ्यासबाट प्रेरित भएर उनले यो व्यवसाय थालेका हुन्। घोराही, तुलसीपुर, लमही र भालुवाङबाट समेत माग आउने गरेको छ भने काठमाडौँबाट आएको माग पूरा गर्न नसकिएको उनले बताए।
पहिले तिहारका लागि मात्र फूल उत्पादन गर्ने रोकाले अहिले बाह्रै महिना फूल उत्पादन गर्न थालेका छन्। वर्षा र बढी चिसोको समयमा भने केही कठिनाइ हुने गरेको छ। सजावटका लागि फूलका बिरुवा बेच्नुका साथै परिवारका सदस्य र अन्य दुई जनालाई रोजगारीसमेत दिएका छन्।
घोराही–१३ डुम्मर गाउँका इन्द्रा बुढा मगरले पनि आठ वर्षदेखि व्यावसायिक रूपमा सयपत्री खेती गर्दै आएका छन्। उनले आठ कठ्ठा भाडाको जग्गामा फूल लगाएका छन् र बनाएका माला शीतभण्डारमा राख्ने गरेका छन्। जिल्लाभित्रै धेरै खपत हुने र मालाको डिजाइनअनुसार मूल्य तय हुने उनले बताए। बाहिरबाट आउने कृत्रिम मालालाई विस्थापित गर्न सकिन्छ भन्ने सोचले आफू यो व्यवसायमा लागेको उनको भनाइ छ।
