खोटाङ — जिल्लामा सक्रिय युवाहरुको समूहले यस वर्ष पनि दशैँ–तिहारका बेला चेलीलाई घरदैलो पुर्याउने निःशुल्क यातायात अभियान सञ्चालन गर्ने भएको छ। ‘दशैँ–तिहार, चेलीलाई उपहार अभियान–२०८३’ नाम दिइएको यो अभियान समूहको तेस्रो वर्षको हो। आर्थिक अभाव वा सवारी सुविधा नपाएर चाडपर्वमा माइतीघर जान नसकेका चेलीलाई घरसम्म पुर्याउने र चाड सकिएपछि पुनः कर्मघर फर्काउने योजना बनाइएको छ।
अभियानका संयोजक सञ्जयकुमार राईका अनुसार दशैँको अवसरमा कातिक ३ देखि ६ गतेसम्म र तिहारको अवसरमा कातिक २४ देखि २६ गतेसम्म गरी दुई चरणमा सेवा दिने तयारी गरिएको हो। सेवा लिने क्रममा महिला, बालबालिका, ज्येष्ठ नागरिक र अपाङ्गता भएका व्यक्तिलाई विशेष प्राथमिकता दिइनेछ। आवश्यकताअनुसार पुरुषलाई पनि सेवा उपलब्ध गराइनेछ।
अभियानमा सहभागी हुन ३५ जना युवाले नाम दर्ता गराएका छन् र स्वयम्सेवाका लागि थप युवाहरु जोडिँदै गरेको राईले जानकारी दिए। मध्यपहाडी लोकमार्ग र सगरमाथा राष्ट्रिय राजमार्गका विभिन्न खण्डसँगै जिल्लाका सबै ग्रामीण सडकमा ३५ किलोमिटरसम्म सेवा दिने योजना छ। पहिले नाम दर्ता गराउनेलाई पहिलो प्राथमिकतामा राखिनेछ।
जिल्लाका अधिकांश सडक कच्ची रहेकाले दुर्घटनाको जोखिमलाई ध्यानमा राखेर यात्रुले बढीमा पाँच किलोग्रामसम्मको झोला मात्रै साथमा राख्न पाउनेछन्।
समूहले यस अभियानमार्फत २०८१ सालमा ३४५ जना र २०८२ सालमा ७०० जनालाई सेवा दिएको थियो। शुभेच्छुहरुको आर्थिक र प्राविधिक सहयोगमा चल्दै आएको अभियानमा एकपटकमा करिब चार लाख रुपैयाँ खर्च हुने गरेको बताइएको छ। सेवा लिन चाहनेहरुले विवरण टिपाउन थालेका छन्।
