होर्मुज जलडमरु पुनः खोल्न इरानले अघि सारेको सातदिने योजनामाथि छलफल अझै टुंगिन नसकेको इरानी विदेशमन्त्री सैयद अब्बास अराघचीले बताएका छन् । इराकको राजधानी बग्दादमा आयोजित इस्लामिक सहयोग संगठनका विदेशमन्त्रीहरूको ५२औँ बैठकका क्रममा आइतबार इरानको सरकारी समाचार एजेन्सी इर्नालाई दिएको अन्तर्वार्तामा उनले यो जानकारी दिएका हुन् ।
शत्रुतापूर्ण गतिविधि रोक्ने र जलडमरु खोल्ने उद्देश्यले इरानले अघि सारेका सर्तहरू समेटिएको सातदिने योजना अमेरिका समक्ष पेस गरिसकिएको अराघचीको भनाइ छ । अमेरिकाले योजनाबारे आफ्नो प्रतिक्रिया दिइसकेको र त्यसको समीक्षा इरानले गरिरहेको उनले बताए ।
अराघचीका अनुसार अमेरिकाले इरानका सर्तहरू स्वीकार गरे छैटौँ दिन जलडमरु पुनः खुल्नेछ भने सातौँ दिनदेखि वार्ता फेरि सुरु हुनेछ । उनले ती सर्तहरू अस्वाभाविक नभएको दाबी गर्दै शान्तिसम्बन्धी समझदारीपत्र र अघिल्ला वार्ताहरूमा अमेरिकाले स्वीकारिसकेका प्रतिबद्धतासँग सम्बन्धित रहेको बताए ।
कुनै पनि धम्कीका अगाडि इरान नझुक्ने र आफ्नो रक्षा गर्न तयार रहेको उल्लेख गर्दै उनले समस्या समाधानका लागि कूटनीतिक बाटो अपनाउन इरान इच्छुक रहेको पनि स्पष्ट पारे ।
स्मरणीय छ, गएको फेब्रुअरी २८ मा अमेरिका र इजरायलले तेहरानसहित इरानका विभिन्न सहरमा संयुक्त आक्रमण गरेका थिए । त्यसको प्रत्युत्तरमा इरानले इजरायल तथा मध्यपूर्वमा रहेका अमेरिकी सैन्य आधारमाथि मिसाइल र ड्रोन प्रहार गरेको थियो र होर्मुज क्षेत्रमाथिको नियन्त्रण थप कडा पारेको थियो । अप्रिल ८ मा युद्धविराम भएपछि जुन १८ मा दुवै पक्षले युद्धका सबै मोर्चा बन्द गर्ने समझदारीपत्रमा हस्ताक्षर गरेका थिए ।
उक्त समझदारीअनुसार इरानको आणविक कार्यक्रम र प्रतिबन्ध फुकुवामा अन्तिम सहमतिका लागि ६० दिनभित्र वार्ता गर्ने तय भएको थियो, तर अगस्ट १७ मा म्याद सकिँदा पनि दुवै पक्ष सम्झौतामा पुग्न असफल भएका थिए । होर्मुज विश्वको प्रमुख ऊर्जा पारवहन मार्ग भएकाले यो विषयले अन्तरराष्ट्रिय तेल आपूर्ति र विश्व ऊर्जा बजारमा प्रत्यक्ष असर पार्न सक्ने ठानिएको छ ।
