चितवन । नारायणगढस्थित चितवन मेडिकल कलेज शिक्षण अस्पतालले बडादसैँको बिदाका दिनहरूमा पनि विशेषज्ञ चिकित्सकसहितको उपचार सेवा सञ्चालन गर्ने भएको छ । अस्पतालका निर्देशक प्रा डा गोपेन्द्र देवका अनुसार कात्तिक २ देखि ५ गतेसम्म अष्टमीदेखि एकादशीका चार दिन आकस्मिक कक्षमार्फत सबै किसिमका सेवा उपलब्ध हुनेछन् ।
यस अवधिमा रेडियोलोजी, प्रयोगशाला र अन्तरङ्ग सेवा समेत नियमित रूपमा सञ्चालन हुने डा देवले जानकारी दिए । उनका अनुसार चाडपर्वका बेला दुर्घटनाका घाइते, हृदयाघात, खाना अपच र झाडापखालाजस्ता समस्या बढ्ने भएकाले विशेषज्ञ टोलीसहित आकस्मिक कक्षबाटै उपचारको प्रबन्ध मिलाइएको हो ।
अस्पतालका प्रमुख कार्यकारी अधिकृत प्रताप देवकोटाले बिदाका समयमा अस्पताल बन्द हुन्छ भन्ने आशङ्काले बिरामी अन्योलमा पर्नसक्ने भएकाले सेवा सञ्चालनबारे सार्वजनिक जानकारी दिनु आवश्यक रहेको बताए । उनले आकस्मिक कक्षमा थप डेस्क राखेर ओपिडी सेवा लिन आउने बिरामीलाई समेत उपचार दिने तयारी गरिएको जानकारी दिए ।
