म्याग्दीको अन्नपूर्ण गाउँपालिका–५ पाउद्धारसहित आसपासका बस्तीमा खसेका पहिरोको प्रारम्भिक भौगर्भिक अध्ययन सम्पन्न भएको छ। यस वर्षको मनसुनजन्य विपद्मा सबैभन्दा बढी क्षति व्यहोरेको पाउद्धार गाउँमा बस्ती बसाउन उपयुक्त हुन्छ वा हुँदैन भन्ने सुझाव दिन अध्ययन गरिएको हो।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले खटाएको परामर्शदाता संस्थाका भूगर्भविद् लेखप्रसाद भट्ट नेतृत्वको टोलीले स्थलगत निरीक्षण, प्रभावित बासिन्दासँगको छलफल, नमुना सङ्कलन र ड्रोनको प्रयोगबाट अध्ययन गरेको हो। गाउँपालिकाको माग र जिल्ला विपद् व्यवस्थापन समितिको सिफारिसमा टोली खटिएको भट्टले बताए।
टोलीमा गाउँपालिका उपाध्यक्ष दिवा तिलिजा पुन, ५ नम्बर वडाध्यक्ष राजेश तिलिजा पुन र प्राविधिक शाखा प्रमुख सहभागी थिए। टोलीले १०० मिटरभन्दा लामा करिब ३० वटा पहिरोको अवस्था हेरेको छ। अध्ययनमा पाउद्धारसँगै नेपाने, गिवाङ, झारवाङ, किन्दु, धस्केखोरे, सोभित्ता, भुवानथान, बिरौटा, शिख र हल्लेखर्क समेटिएका छन्।
प्रारम्भिक निष्कर्षमा गाउँमाथिको पहिरो, जमिनमा परेका ठूला चिरा र ढल्किएका रुखका कारण थप जोखिम देखिएको छ। करिब १५ घर उच्च जोखिममा रहेको भट्टले बताए। पहिरोको जोखिमबारे सुझावसहितको विस्तृत प्रतिवेदन गाउँपालिकालाई बुझाइने छ।
गिवाङमा असोज ११ गते पहिरोमा पुरिएर दुई जनाको ज्यान गएको थियो भने २८ घर पूर्ण रूपमा क्षतिग्रस्त भएका थिए। दुई सयभन्दा बढी घर भएको पाउद्धार गाउँ चारैतिर पहिरोले घेरिएको छ। पाउद्धार जोड्ने सडक अझै बन्द छ; स्थानीयले श्रमदानबाट पैदलमार्ग खोलेका छन्, अस्थायी विद्युत् पुगेको छ र खानेपानी मर्मत अभियान चलिरहेको छ।
असोज ११ गते हेलिकप्टरबाट उद्धार गरी घारस्थित आश्रयस्थलमा लगिएका ११५ जना आफन्त र छिमेकीका खाली घर तथा सुरक्षित ठाउँमा बनाइएका टहरामा बस्न थालेका छन्। उपाध्यक्ष पुनका अनुसार भूगर्भविद्को सुझाव र प्रतिवेदनकै आधारमा पुनर्निर्माण अघि बढाइनेछ, र अन्य बस्तीका पहिरोको अध्ययनका लागि पनि पहल भइरहेको छ।
