बंगालको खाडीमा विकसित भएको चक्रवात अर्नब जमिनमा प्रवेश गरेपछि कमजोर हुँदै गहिरो न्यूनचापीय प्रणालीमा परिणत भएको छ। बुधबार बिहान करिब ८:१५ बजे भारतको आन्ध्रप्रदेश र यानमको तटीय क्षेत्र हुँदै जमिनमा छिरेको उक्त प्रणाली उत्तर–उत्तरपश्चिमतर्फ अघि बढिरहेको छ। यसको प्रभावले बिहीबारदेखि नै नेपालभर बादल लागेको थियो भने आज वर्षाको मात्रा बढ्ने र धेरै क्षेत्रमा फैलिने पूर्वानुमान गरिएको छ।
मौसम विज्ञान विभागका प्रवक्ता विभूति पोखरेलले प्रणाली कमजोर भए पनि वर्षा, हिमपात र हावाहुरीको सम्भावना कायमै रहेकाले सजग रहनुपर्ने बताएकी छन्। त्रिभुवन विश्वविद्यालयका सहप्राध्यापक डा. विनोद पोखरेलका अनुसार आज अपराह्नदेखि रातिसम्म कोशी र बागमतीका धेरै ठाउँमा भारी वर्षा हुन सक्छ। कात्तिक १४ गतेसम्म कोशी, मधेश, बागमती, गण्डकी र लुम्बिनीका अधिकांश स्थानमा मेघगर्जन र चट्याङसहित मध्यम वर्षा तथा हिमपात हुने सम्भावना छ, भने कर्णाली र सुदूरपश्चिमका हिमाली तथा पहाडी भूभागका एक–दुई स्थानमा पनि भारी वर्षा र हिमपात हुन सक्छ। शनिबारदेखि प्रभाव क्रमशः कमजोर हुँदै जाने अनुमान छ।
सरकारले सुरक्षा अंगलाई उच्च सतर्क अवस्थामा राखेको छ। बिहीबार बसेको विपद् प्रतिकार्य कमाण्ड पोष्टको बैठकले जोखिम भएका जिल्लामा निरन्तर सूचना लिने, सर्वसाधारणलाई जानकारी दिने, पूर्वतयारी गर्ने र आवश्यक परे प्रतिकार्यका लागि तयार रहने निर्देशन दिएको थियो। राष्ट्रिय विपद् जोखिम न्यूनीकरण तथा व्यवस्थापन प्राधिकरणले हिमाली र उच्च पहाडी क्षेत्रमा पर्वतारोहण तथा पदयात्रा नगर्न, पदयात्रामा रहेकालाई सुरक्षित स्थानमा बस्न र किसानलाई कात्तिक १४ गतेसम्म धान नकाट्न सुझाव दिएको छ। उच्च हिमाली भेगमा बाक्लो हिमपात, हिमआँधी र हिमपहिरोको जोखिम रहेकाले विशेष सावधानी अपनाउन भनिएको छ। चिसो बढेको छ भने पहिरो र यातायात अवरोधको सम्भावनालाई ध्यानमा राख्दै यातायात व्यवसायीलाई प्रहरी र प्रशासनसँग समन्वय गरेर मात्र सवारी सञ्चालनबारे निर्णय गर्न भनिएको छ।
