नेकपा (एमाले)का स्थायी कमिटी सदस्य तथा पूर्वपरराष्ट्रमन्त्री प्रदीप ज्ञवालीले आजको विश्वले भोगिरहेको आर्थिक असमानता र सामाजिक विभाजनको निकास समाजवादी बाटोमा खोज्न सकिने बताएका छन्।
साइप्रसको कम्युनिस्ट पार्टी (एकेल) स्थापनाको सय वर्ष पुगेको अवसरमा नोभेम्बर ७ मा निकोसियामा भएको अन्तर्राष्ट्रिय गोष्ठीमा बोल्दै उनले समकालीन पुँजीवादले सम्पत्ति र अवसर केही सीमित धनाढ्यको हातमा थुपारेको टिप्पणी गरे। विश्वमा सम्पत्ति, वैज्ञानिक ज्ञान र उत्पादन क्षमता अभूतपूर्व रूपमा बढे पनि त्यसको फाइदा सबैसम्म नपुगेको उनको भनाइ थियो।
करिब एक अर्ब मानिस अझै चरम गरिबीमा रहेको, श्रमिकले रोजगारीको अनिश्चितता र न्यून ज्याला भोगिरहेको तथा शिक्षा, स्वास्थ्य र आवासजस्ता आधारभूत आवश्यकता बजारको वस्तु बनेको उनले बताए। उनका अनुसार यी समस्या पुँजीवादी व्यवस्थाका गम्भीर कमजोरी हुन्।
अन्तर्राष्ट्रिय सम्बन्धमा शक्ति र प्रभुत्वको सट्टा अन्तर्राष्ट्रिय कानुन, राष्ट्रिय सार्वभौमसत्ता र संवादलाई अग्रस्थान दिनुपर्नेमा उनले जोड दिए।
समाजवाद कुनै तयार सिद्धान्त वा विगतको सम्झनामा सीमित नभई शोषण र असमानताविरुद्धको ऐतिहासिक विकल्प भएको उनले बताए। मार्क्सवादलाई बदलिँदो विश्व परिवेशअनुसार सिर्जनात्मक रूपमा प्रयोग गर्नुपर्ने उनको भनाइ थियो। कृत्रिम बौद्धिकता र डिजिटल प्रविधि मानव कल्याणका लागि उपयोग हुनुपर्नेमा जोड दिँदै उनले प्रविधिमाथि कर्पोरेट नियन्त्रण बढ्दा रोजगारी गुम्ने र सम्पत्ति केन्द्रित हुने जोखिम औँल्याए।
नेपालको अनुभव सुनाउँदै ज्ञवालीले एमालेले मार्क्सवाद र जनताको बहुदलीय जनवादलाई नेपालको विशिष्ट परिस्थितिअनुसार अवलम्बन गरेको बताए। लोकतान्त्रिक संस्थाहरू भत्काउनुलाई क्रान्ति मान्न नसकिने उल्लेख गर्दै उनले राजनीतिक परिवर्तनको बाटो हिंसा नभई शान्तिपूर्ण लोकतान्त्रिक प्रतिस्पर्धा हुनुपर्ने बताए। युवा पुस्ताका आकांक्षालाई सम्बोधन गर्दै संवैधानिक संस्थाहरूलाई बलियो बनाउनुपर्नेमा उनले जोड दिए।
विश्वभरका वामपन्थी आन्दोलनबीच शान्ति, समानता, श्रमिक अधिकार, सामाजिक सुरक्षा र जलवायु न्यायका लागि अन्तर्राष्ट्रिय ऐक्यबद्धता आवश्यक रहेको उनले बताए।
