काठमाडौं । नेपालका लागि नवनियुक्त भारतीय राजदूत सुधाकर दलेला जिम्मेवारी सम्हाल्न मंगलबार काठमाडौं आइपुगेका छन् । भारतीय विदेश मन्त्रालयले गत असोजको अन्तिम साता उनलाई नेपालका लागि राजदूत नियुक्त गरेको थियो । त्रिभुवन अन्तर्राष्ट्रिय विमानस्थलमा परराष्ट्र मन्त्रालय र भारतीय राजदूतावासका अधिकारीहरूले उनलाई स्वागत गरे ।
दलेलाको आगमन भारतीय विदेश सचिव विक्रम मिश्रीको नेपाल भ्रमणको पूर्वसन्ध्यामा भएको हो । मिश्री भोलिबाट नेपाल भ्रमणमा आउँदैछन् । उनको भ्रमणअघि नै राजदूतले जिम्मेवारी सम्हाल्न नेपाल आइपुगेका हुन् ।
दलेला यसअघि भारतको विदेश मन्त्रालयमा आर्थिक सम्बन्ध सचिवका रूपमा कार्यरत थिए । उनी सन् २०२५ देखि उक्त जिम्मेवारीमा रहेका थिए । त्यसअघि उनले भुटानका लागि भारतीय राजदूतका रूपमा तीन वर्ष सेवा गरेका थिए । भारतले नेपालमा विदेश मन्त्रालयको सचिवस्तरका करिअर कूटनीतिज्ञलाई राजदूत नियुक्त गरेको यो सम्भवतः पहिलोपटक हो ।
दलेला सन् १९९३ मा भारतीय परराष्ट्र सेवामा प्रवेश गरेका थिए । उनले आफ्नो कूटनीतिक जीवन इजरायलको तेल अभिभबाट सुरु गरेका थिए । उनले ब्रासिलिया, शिकागो, ढाका, जेनेभा, थिम्पु र वासिङ्टन डी.सी.स्थित भारतीय कूटनीतिक नियोगहरूमा सेवा गरेका छन् । सन् २००९ देखि २०११ सम्म उनी प्रधानमन्त्री कार्यालयमा निर्देशकका रूपमा काम गरेका थिए ।
उनको मुख्य जिम्मेवारी भारतका दक्षिण एसियाली छिमेकी राष्ट्रहरू, पूर्वी एसिया तथा इन्डो–प्यासिफिक क्षेत्र, खाडी, मध्यपूर्व र अफ्रिकी देशहरूसँगको भारतको सम्बन्धमा केन्द्रित थियो । उनीसँग व्यापार तथा आर्थिक नीतिको क्षेत्रमा पनि अनुभव छ । उनले नयाँ दिल्लीस्थित वाणिज्य विभागमा व्यापार नीति निर्देशकका रूपमा काम गरेका छन् र विश्व व्यापार संगठनमा भारतको स्थायी नियोगमा दुई पटक सेवा गरेका छन् ।
