इक्वेडरको ग्वायाकिल सहरस्थित पर्पेतुओ सोकोरो चर्चमा शनिबार प्रार्थना चलिरहेका बेला एउटा भारी काठको क्रस खसेर पादरीको मृत्यु भएको छ। मृतक पादरीको नाम प्याट्रिसियो अल्फ्रेडो सान्चेज मोलिनारी रहेको ग्वायाकिल आर्चडाइओसिजले पुष्टि गरेको छ। उनी रेडेम्प्टोरिस्ट धार्मिक संस्थाका सदस्य तथा उक्त चर्चका पारिश पुजारी थिए।
प्रत्यक्ष प्रसारण भइरहेको प्रार्थनासभामा सान्चेज मोलिनारी जीवनको क्षणभंगुरताबारे प्रवचन दिइरहेका थिए। उनले उपस्थित भक्तजनलाई मोबाइल फोन चलाउँदै समय नबिताउन र ईश्वर तथा आफन्तसँग बिताउने समय नै सबैभन्दा अर्थपूर्ण हुने बताएका थिए। उनले “एकदिन यहाँ उपस्थित हामी सबैको पनि मृत्यु हुनेछ” भन्नेलगत्तै वेदीपछाडि भित्तामा रहेको क्रस अचानक अगाडि ढल्कियो र उनको टाउकोमा बजारियो।
घटना देखेर त्रसित भक्तजन सहयोगका लागि दौडिए र तत्काल एम्बुलेन्स बोलाइयो। उद्धारकर्मी चाँडै घटनास्थल पुगे पनि उनलाई बचाउन सकिएन। प्रहरीले घटनाबारे अहिलेसम्म कुनै सार्वजनिक टिप्पणी गरेको छैन।
आइतबार ग्वायाकिलका आर्चबिशप कार्डिनल लुइस काब्रेराको नेतृत्वमा उनको सम्झनामा विशेष प्रार्थनासभा आयोजना गरिएको थियो। ५३ वर्षीय मोलिनारीले यसअघि लोस रिओस प्रान्तको भिन्सेसस्थित सान लोरेन्जो पारिशमा पनि सेवा गरेका थिए।
