१५ कात्तिक, स्याङ्जा । स्याङ्जाको वालिङ नगरपालिकामा ट्याक्टर पल्टिँदा एक जनाको ज्यान गएको छ भने चार जना घाइते भएका छन् ।
हुवासबाट वालिङतर्फ जाँदै गरेको ट्याक्टर आइतबार साँझ वालिङ नगरपालिका–९ को गाइस्वारामा सडकको बायाँतर्फ पल्टिएको प्रहरीले जनाएको छ । दुर्घटना साँझ करिब ६:५० बजे भएको थियो ।
ट्याक्टरमा सवार वालिङ–१० का ६१ वर्षीय नन्दलाल बुढामगरको उपचारका क्रममा मृत्यु भएको हो । उनलाई प्राथमिक स्वास्थ्य केन्द्र वालिङ लगिएको थियो, जहाँ साँझ ७:३५ बजे चिकित्सकले मृत घोषणा गरेका थिए ।
चालक दाङको शान्तिनगर गाउँपालिका–१ का ३७ वर्षीय धनवीर पुनमगरको टाउकोमा चोट लागेको छ र उनको अवस्था मध्यम छ । पर्वत घर भई वालिङ–१० बस्दै आएका ४३ वर्षीय प्रेम रानामगर गम्भीर घाइते भएका छन् । उनको टाउको र शरीरभित्र चोट लागेको र उनी बोल्न नसक्ने अवस्थामा रहेको प्रहरीले जनाएको छ ।
वालिङ–१० कै २० वर्षीय सुलभ परियारको बायाँ हात, खुट्टा र कम्मरमा चोट लागेको छ भने सोही ठाउँका ४६ वर्षीय झकबहादुर थापाको दाहिने हात र ढाडमा चोट लागेको छ । दुवैको अवस्था मध्यम छ ।
घाइते सबैको प्राथमिक स्वास्थ्य केन्द्र वालिङमा उपचार भइरहेको छ । जिल्ला प्रहरी कार्यालय स्याङ्जाका सूचना अधिकारी डीएसपी रमेशदत्त अवस्थीका अनुसार ट्याक्टरको नम्बर ग १ त ५७६९ हो । वडा प्रहरी कार्यालय वालिङबाट खटिएको टोलीले दुर्घटनाबारे थप अनुसन्धान गरिरहेको छ ।
