काठमाडौं । नेपाल बैंक लिमिटेडका क्रेडिट कार्ड प्रयोगकर्ताले अब कुनै अग्रिम भुक्तानी नगरी सामान किनेर किस्ताबन्दीमा रकम तिर्न पाउने भएका छन् । बैंकले आफ्ना योग्य कार्डवाहकका लागि तत्काल किस्ताबन्दी सेवा सुरु गरेको हो ।
यो सेवाका लागि बैंकले ‘बाइ नाउ पे लेटर’ प्लेटफर्म सञ्चालन गर्ने फिनटेक कम्पनी फिनटारा सोलुसन्ससँग व्यावसायिक सम्झौता गरेको छ । काठमाडौंस्थित नेपाल बैंकको केन्द्रीय कार्यालयमा दुवै संस्थाका उच्च अधिकारीहरूको उपस्थितिमा सम्झौतापत्रमा हस्ताक्षर भएको हो ।
सम्झौतासँगै ग्राहकले वनबीएनपीएलको सञ्जालमा आबद्ध पसल तथा संस्थाबाट सामान खरिद गर्दा एकमुष्ट ठूलो रकम तिर्नुपर्ने बाध्यता हटेको छ । खरिद गरिएको रकम ३ देखि १८ महिनासम्मको लचिलो किस्तामा चुक्ता गर्न सकिनेछ ।
बैंकका अनुसार यो सुविधा १५० भन्दा बढी अनलाइन तथा अफलाइन व्यापारिक प्रतिष्ठानमा उपलब्ध हुनेछ । खुद्रा पसल, मोबाइल तथा ग्याजेट स्टोर, घरायसी उपकरण बिक्रेता, अस्पताल, रिसोर्ट तथा भ्रमण प्याकेज प्रदायकलगायतका क्षेत्र यसमा समेटिएका छन् ।
सम्झौता कार्यक्रममा बैंकका प्रमुख कर्जा अधिकृत प्रदीप कुमार पाठकले उदीयमान फिनटेक कम्पनीहरूसँगको साझेदारीमार्फत कार्ड प्रयोगकर्तालाई आधुनिक डिजिटल सेवा दिने लक्ष्य रहेको बताए । फिनटारा सोलुसन्सका कार्यकारी निर्देशक आशिष शर्माले देशभर सबैभन्दा ठूलो ग्राहक आधार भएको सरकारी बैंकमार्फत सेवा सुरु हुनु कर्जामा सहज पहुँच बढाउने दिशामा कोसेढुङ्गा भएको धारणा राखे ।
कार्यक्रममा बैंकका रिटेल कर्जा विभाग प्रमुख अर्जुन बहादुर कँडेल र कार्ड विभाग प्रमुख दीपक रेग्मीले ग्राहकका बदलिँदा आवश्यकतालाई पूरा गर्न यस्तो साझेदारी महत्त्वपूर्ण रहेको बताए ।
