काठमाडौं । नेपाल प्रिमियर लिग (एनपीएल) को तेस्रो सिजनका लागि सुदूरपश्चिम रोयल्सले पाकिस्तानका पूर्वकप्तान मिसबाह उल हकलाई मुख्य प्रशिक्षक नियुक्त गरेको छ ।पहिलो र दोस्रो सिजनमा टोलीको मुख्य प्रशिक्षक रहेका जगत टमाटाको स्थान मिसबाहले लिने छन् ।पाकिस्तानका सफल ब्याटरमध्ये एक मिसबाहले तीनवटै प्रारूपमा अन्तर्राष्ट्रिय क्रिकेट खेलेका छन् । उनले पाकिस्तानका लागि ७५ टेस्ट, १६२ एकदिवसीय र ३९ टी–२० अन्तर्राष्ट्रिय खेल खेले । तीनवटै प्रारूपमा उनले ११ हजारभन्दा बढी रन बनाएका छन् ।टेस्ट क्रिकेटमा उनले ५ हजार २२२ रन बनाएका छन् । यसमा १० शतक र ३९ अर्धशतक छन् भने उच्च स्कोर १६१ रन हो । एकदिवसीयमा ५ हजार १२२ रन र टी–२० अन्तर्राष्ट्रियमा ७८८ रन बनाएका छन् ।कप्तानका रूपमा पनि मिसबाहको उपलब्धि उल्लेखनीय छ । उनको नेतृत्वमा पाकिस्तानले ५६ टेस्टमध्ये २६ मा जित हासिल गर्यो । सन् २०१६ मा पाकिस्तान पहिलोपटक आईसीसी टेस्ट वरीयताको शीर्ष स्थानमा पुगेको थियो ।सन् २०१५ को एकदिवसीय विश्वकपपछि उनले सीमित ओभरको क्रिकेटबाट र सन् २०१७ मा टेस्ट क्रिकेटबाट संन्यास लिएका थिए । सन् २०१९ देखि २०२१ सम्म उनी पाकिस्तानको राष्ट्रिय पुरुष टोलीका मुख्य प्रशिक्षक तथा प्रमुख छनोटकर्ता थिए ।एनपीएलको पहिलो र दोस्रो सिजनमा सुदूरपश्चिम रोयल्सले लिग चरणमा शीर्ष स्थान हासिल गर्दै फाइनलसम्मको यात्रा गरेको थियो । तर उपाधि भिडन्तमा टोली पराजित भएको थियो ।