स्विट्जरल्याण्डको स्विस नेशनल काउन्सिलका राष्ट्रपति ६ सदस्यीय संसदीय प्रतिनिधिमण्डलको नेतृत्व गर्दै औपचारिक भ्रमणका लागि नेपाल आइपुगेका छन् ।
संघीय संसद, प्रतिनिधि सभाका सभामुखको औपचारिक निमन्त्रणामा नेपाल आएका उनी कतार एयरको क्यूआर ६४८ नम्बरको उडानमार्फत काठमाडौँ अवतरण गरेका हुन् ।
नेपाल भ्रमणको पहिलो दिन नै प्रतिनिधिमण्डलले राष्ट्रपति रामचन्द्र पौडेल, प्रतिनिधि सभाका सभामुख देवप्रसाद अर्याल र राष्ट्रिय सभाका अध्यक्ष नारायणप्रसाद दाहालसँग शिष्टाचार भेटघाट गरेको छ । उक्त भेटका क्रममा नेपालले बेहोरेको पछिल्लो प्राकृतिक विपद्पछिको पुनर्निर्माण, दुई देशबीचको पारस्परिक सम्बन्ध तथा संसदीय हितका विविध विषयमा छलफल भएको संघीय संसद सचिवालयले जनाएको छ ।
शिष्टाचार भेटघाटपश्चात् पाटन संग्रहालयमा आयोजित फोटो प्रदर्शनी सभामुख र स्विस नेशनल काउन्सिलका राष्ट्रपतिले संयुक्त रूपमा उद्घाट गरेका छन् ।
भ्रमण तालिका अनुसार प्रतिनिधिमण्डलले कात्तिक २० गते नेपाल–स्विट्जरल्याण्ड संसदीय मैत्री समूहका सदस्य र संघीय संसदका दुवै सदनका पाँचवटा समितिका सभापतिसँग भेटघाट गर्ने कार्यक्रम रहेको छ । सोही दिन सभामुखले स्विस प्रतिनिधिमण्डलको स्वागतार्थ दिवाभोजको समेत आयोजना गरेका छन् ।
नेपाल बसाइको क्रममा प्रतिनिधिमण्डलले काठमाडौं उपत्यकास्थित धार्मिक तथा ऐतिहासिक सम्पदास्थल बौद्धनाथ क्षेत्र र पाटन दरबार क्षेत्रको अवलोकन गर्नेछ । त्यसैगरी, हालै त्रिशूली (भोटेकोशी) नदीमा आएको विनाशकारी बाढीपहिराबाट प्रभावित क्षेत्र नुवाकोटको विदुर नगरपालिका क्षेत्रको अवलोकन गर्नुका साथै ललितपुर महानगरपालिकाका प्रमुख चिरिबाबु महर्जनसँग समेत भेटघाट गर्ने कार्यक्रम तय भएको छ ।
