काठमाडौं । पूर्वप्रधानमन्त्री एवं नेपाली कम्युनिस्ट पार्टी (नेकपा) का संयोजक पुष्पकमल दाहाल प्रचण्डले देश गम्भीर सङ्कटमा परेको भन्दै सबैखाले आग्रह र पूर्वाग्रह त्यागेर बृहत् कम्युनिस्ट एकतामा आउन आह्वान गरेका छन् ।
मंगलबार पार्टी केन्द्रीय कार्यालय पेरिसडाँडामा आयोजित पार्टी एकता घोषणा सभालाई सम्बोधन गर्दै उनले विगतमा सहकार्य गरेका सबै शीर्ष वामपन्थी नेताहरूलाई यस्तो अपिल गरेका हुन् । उनले कमरेड केपी ओली, मोहनविक्रम सिंह, मोहन वैद्यलगायत सबैलाई एकताको महाअभियानमा जुट्न आग्रह गरे ।
‘देश सङ्कटमा छ, त्यसैले सबैखाले आग्रह र पूर्वाग्रहबाट मुक्त भएर एकताको यो महाअभियानमा जुटौँ,’ प्रचण्डले भने ।
सम्बोधनका क्रममा उनले विगतका एकता प्रयासहरू सम्झिँदै आफू शान्ति प्रक्रियामा आएदेखि नै तत्कालीन नेकपा एमालेसँग एकताका लागि पटक–पटक पहल गरेको बताए । संविधान जारी भएपछि जनताले कम्युनिस्टहरूबाट ठुलो अपेक्षा गरेकाले आफू फेरि एकताको प्रस्ताव लिएर केपी शर्मा ओलीकहाँ पुगेको उनले स्मरण गरे ।
‘सजिलैसँग एकता नहुने देखेपछि मैले तपाईं नै प्रधानमन्त्री बन्नोस् भनेको थिएँ,’ प्रचण्डले भने, ‘त्यसपछि चुनावी कार्यगत एकता र निर्वाचनलगत्तै पार्टी एकता गर्ने सहमति भयो । निर्वाचनमा हामीले झण्डै दुई–तिहाइ मत पनि प्राप्त गर्यौँ ।’
उनले निर्वाचनमा प्राप्त त्यो जनमत देशमा सुशासन र समाजवादको आधार तयार पार्ने सुनौलो अवसर भए पनि दुर्भाग्यवश त्यसलाई जोगाउन नसकिएको स्वीकार गरे । विगतको एकता असफल भए पनि त्यसबाट निराश नभई पाठ सिक्नुपर्ने बताउँदै उनले देश र जनताको हितका लागि पुनः एकता र ध्रुवीकरणको पहल थालिएको बताए । अहिलेको सहकार्य त्यसैको सुरुआत भएको उनले स्पष्ट पारे ।
