काठमाडौं । नेपाल प्रिमियर लिग (एनपीएल) को तेस्रो संस्करणमा पहिलोपटक डिसिजन रिभ्यू सिस्टम (डीआरएस) लागू हुने भएको छ । नेपाल क्रिकेट संघ (क्यान) ले मंगलबार सामाजिक सञ्जालमार्फत यसबारे औपचारिक जानकारी दिएको हो ।
क्यानका सचिव पारस खड्काका अनुसार डीआरएसका लागि अहिलेसम्म दुई वटा कम्पनीसँग प्रविधिको परीक्षण सकिसकिएको छ । अब ती प्रणालीको तथ्यपरकता अर्थात् एक्युरेसी मापन गरेपछि मात्र कुन कम्पनीको प्रविधि प्रयोग गर्ने भन्ने अन्तिम टुंगो लाग्नेछ । खड्काले यसअघि नै एनपीएलमा डीआरएस भित्र्याउने काम अघि बढिरहेको जानकारी दिएका थिए ।
क्यानले सार्वजनिक गरेको विवरणअनुसार एनपीएलमा एलबीडब्लुको पुनरावलोकनका लागि फूल थ्रीडी बल ट्रयाकिङ प्रविधि प्रयोग गरिनेछ । यस्तै रनआउट, स्टम्पिङ र नो बलका निर्णयसमेत रिभ्यू गर्न सकिनेछ । कृत्रिम बौद्धिकता (एआई) मार्फत ब्याटमा लागेको किनारा (एज) पत्ता लगाइनुका साथै वाइड बलको उचाइ, छक्काको लम्बाइ र उचाइ मापनलगायतका बलिङ विश्लेषणात्मक सुविधा पनि उपलब्ध हुनेछन् ।
डीआरएस क्रिकेटमा अम्पायरको निर्णयमाथि प्रश्न उठाउने अधिकार टिमहरूलाई दिने आधुनिक प्रविधि हो । यसबाट बलिङ टिमले गुमेको विकेट फर्काउन र ब्याटिङ टिमले गलत निर्णय उल्ट्याउन पाउनेछन् । एनपीएलजस्तो फ्रेन्चाइज लिगमा यो स्तरको प्रविधिको प्रयोगले खेलको निष्पक्षता र विश्वसनीयता दुवै बढ्ने विश्वास गरिएको छ ।
