काठमाडौँ — स्वास्थ्य तथा खाद्य स्वच्छतामन्त्री निशा मेहता र नेपालका लागि जापानका राजदूत माएदा तोरुबीच बुधबार मन्त्रालयमा शिष्टाचार भेटवार्ता भएको छ।
भेटमा नेपाल–जापान सम्बन्ध, दुई देशबीचको आपसी सहकार्य र स्वास्थ्य क्षेत्रमा सहयोग विस्तारका सम्भावित क्षेत्रबारे छलफल भएको मन्त्री मेहताको सचिवालयले जनाएको छ। स्वास्थ्य सेवामा जापानको निरन्तर सहयोग र आगामी सहकार्यका विषयमा दुवै पक्षबीच विचार आदानप्रदान भएको थियो।
भेटका क्रममा मन्त्री मेहताले भोटेकोशी बाढीबाट प्रभावित जिल्लामा जापान सरकारले उपलब्ध गराएको राहत, प्राविधिक उपकरण तथा प्रविधिसम्बन्धी सहयोगप्रति राजदूत तोरुलाई धन्यवाद दिइन्। उनले वीर अस्पताल, परोपकार प्रसूति तथा स्त्रीरोग अस्पताल र कान्ति बाल अस्पताललगायतका स्वास्थ्य संस्थामा जापानले पुर्याउँदै आएको सहयोगको प्रशंसा समेत गरिन्।
जापान नेपालको स्वास्थ्य क्षेत्रमा लामो समयदेखि सहयोग गर्दै आएको साझेदार मुलुक हो। अस्पतालको पूर्वाधार, उपकरण र प्राविधिक सहयोगका क्षेत्रमा जापानको साथ रहँदै आएको छ। मन्त्री मेहताले आगामी दिनमा पनि यस्तो सहकार्य निरन्तर रहने अपेक्षा व्यक्त गरिन्।
राजदूत तोरुले नेपाल सरकारका प्राथमिकता र आवश्यकताका आधारमा जापान सहयोग गर्न तयार रहेको बताए। उनले दुई देशबीचको सम्बन्ध र सहकार्यलाई थप सुदृढ बनाउने प्रतिबद्धता व्यक्त गरेको सचिवालयले जनाएको छ।
