युक्रेनका राष्ट्रपति भोलोदिमिर जेलेन्स्कीले अमेरिकी प्रथम महिला मेलानिया ट्रम्पलाई आफ्नो देशको सबैभन्दा ठूलो सम्मान प्रदान गरेका छन्। युद्धग्रस्त युक्रेनलाई मानवीय क्षेत्रमा पुर्याएको उल्लेखनीय व्यक्तिगत योगदानको कदर गर्दै उनलाई ‘अर्डर अफ प्रिन्सेस ओल्गा, फर्स्ट क्लास’ बाट सम्मानित गरिएको हो।
यो सम्मान खेरसोन क्षेत्रको ओलेस्की सहरबाट सयौँ सर्वसाधारणलाई सुरक्षित रूपमा बाहिर निकाल्न दिइएको युद्धविराम सम्पन्न भएपछि प्रदान गरिएको हो। उक्त सहर रुसको नियन्त्रणमा छ। युद्धविरामको अवधिमा त्यहाँ फसेका नागरिकलाई बाहिर निकाल्ने काम भएको थियो।
उद्धार कार्यमा संलग्न रुसी र युक्रेनी अधिकारीहरूको प्रतिनिधिमण्डल बिहीबार ह्वाइट हाउस पुग्ने अपेक्षा गरिएको छ। उनीहरू ट्रम्पको निमन्त्रणामा वासिङ्टन जान लागेका हुन्। टोलीमा युक्रेनका ओम्बुड्सम्यान डिमिट्रो लुबिनेट्स, उनका रुसी समकक्षी याना लान्ट्राटोभा, युक्रेनी सांसद डेभिड अराखामिया र वरिष्ठ रुसी अधिकारी किरिल डिमिट्रिएभ छन्। लुबिनेट्स र लान्ट्राटोभाले गत हप्ता ओलेस्कीको संयुक्त भ्रमण गरेका थिए।
ह्वाइट हाउसले मेलानिया ट्रम्पले दुवै पक्षबीच स्वतन्त्र रूपमा वार्ता गराएर युद्धविराम सम्भव बनाएको बताएको छ। ह्वाइट हाउसका अनुसार यो अमेरिकी प्रथम महिलाले गरेको अभूतपूर्व कूटनीतिक पहल हो। रुसी र युक्रेनी अधिकारीहरूले युद्धविराममा सहयोग गरेकोमा उनलाई पटक-पटक धन्यवाद दिएका छन्, तर उनको संलग्नताको प्रकृति र सीमाबारे विस्तृत विवरण भने दुवै पक्षले सार्वजनिक गरेका छैनन्।
