काठमाडौं । अर्थमन्त्री डा. स्वर्णिम वाग्लेले वर्तमान सरकारले अर्को चुनावसम्म आफ्नो कार्यकाल पूरा गर्ने र झन् बलियो शक्तिका रूपमा फर्किने दाबी गरेका छन् । नेपाल इन्फ्रास्ट्रक्चर समिटबारे आयोजित कार्यक्रममा बोल्दै उनले सरकार गठन भएको साढे सातदेखि आठ महिनाको अवधिमा गरेका कामप्रति कसैले औँला ठड्याउन नसकेको बताए ।
उनले यही गति साढे चार वर्षसम्म कायम राखेमा आगामी निर्वाचनमा सरकार झन् ठूलो शक्तिका रूपमा आउने विश्वास व्यक्त गरे । वाग्लेले जुद्धशमशेरपछि कुनै पनि सरकारले पाँच वर्ष पूरा गर्न नसकेको स्मरण गर्दै अब त्यो क्रम भंग हुने बताए । उनले सरकारले भ्रष्टतन्त्रको सफाइ गर्ने प्रतिबद्धता पनि दोहोऱ्याए ।
सरकारले कानुनी सुधारलाई तीव्रता दिएको उनको भनाइ छ । विगत साढे तीन वर्षमा ३५ वटा ऐन बनेकोमा अहिले एकैपटक १६६ वटा ऐनमाथि काम भइरहेको र तीमध्ये ५९ वटा ऐनलाई एउटै प्याकेजमा अघि बढाउने तयारी रहेको उनले जानकारी दिए । उनले यसलाई ‘बिग ब्याङ’ सुधार भन्दै कामको गति अब अझ बढ्ने बताए ।
पूर्वाधार विकासमा पनि सरकारले एकैपटक आठदेखि १० वटा ठूला आयोजनालाई अघि बढाउने गरी काम गरिरहेको छ । विकासका सबै काम राज्यले मात्रै गर्नुपर्ने अवस्था अन्त्य गर्न निजी क्षेत्रको सहभागिता बढाउने नीति सरकारले लिएको छ । निजी क्षेत्रलाई लगानीका लागि बाटो खोल्ने गरी बजेट ल्याइएको र वैकल्पिक विकास वित्तसम्बन्धी व्यवस्था कार्यान्वयनमा जाने वाग्लेको भनाइ छ ।
ठूलो बाढीपहिरोको सामना गर्नुपरे पनि राजस्व संकलनको गति राम्रो रहेको उल्लेख गर्दै उनले यसलाई सुशासनको लाभांशका रूपमा व्याख्या गरे । सरकारले सुशासन, कानुनी सुधार, पूर्वाधार विकास र निजी क्षेत्रको लगानी विस्तारलाई सँगसँगै अघि बढाउने उनको भनाइ थियो ।
