नेपाल प्रिमियर लिगको तेस्रो संस्करणमा शनिबार साँझ निकै प्रतीक्षित भिडन्त हुँदैछ। कीर्तिपुरस्थित त्रिवि अन्तर्राष्ट्रिय क्रिकेट मैदानमा बेलुकी ५ बजे साबिक विजेता लुम्बिनी लायन्स र काठमाण्डु गोर्खाज आमनेसामने हुनेछन्। दुवै टोली जितको लक्ष्यसहित मैदान उत्रनेछन्।
यो संस्करणमा लुम्बिनीले अहिलेसम्म हार बेहोरेको छैन। चार खेलमा तीन जित र एक नतिजाविहीन खेलसहित सात अंक जोडेको लुम्बिनी अंक तालिकाको शीर्ष स्थानमा छ। उद्घाटन खेलमा सुदूरपश्चिम रोयल्सलाई सात विकेटले हराएको लुम्बिनीले त्यसपछि पोखरा एभेन्जर्सलाई आठ विकेट र जनकपुर बोल्ट्सलाई १६ रनले पराजित गर्यो। चितवन राइनोजसँगको खेल वर्षाका कारण रद्द भएपछि दुवै टोलीले एक–एक अंक बाँडेका थिए।
काठमाण्डुको यात्रा भने मिश्रित रह्यो। पहिलो खेलमा जनकपुर बोल्ट्ससँग आठ विकेटले पराजित भएको टोलीले त्यसपछि लगातार दुई जित निकालेको छ। कर्णाली याक्सविरुद्ध १८१ रनको लक्ष्य पछ्याउँदै चार विकेटको जित हात पारेको काठमाण्डुले बिहीबार विराटनगर किङ्ग्सलाई नौ विकेटले हरायो। तीन खेलमा दुई जित र एक हारसहित चार अंक जोडेको काठमाण्डु तालिकाको तेस्रो स्थानमा छ।
यी दुई टोलीबीच अहिलेसम्म तीन खेल भएका छन्, जसमध्ये काठमाण्डुले दुई र लुम्बिनीले एक खेल जितेका छन्। दोस्रो संस्करणको लिग चरणमा काठमाण्डुले लुम्बिनीलाई २२ रनले हराएको थियो भने एलिमिनेटरमा लुम्बिनीले चार विकेटको जित निकाल्दै बदला लिएको थियो। त्यसैले आजको खेलमा काठमाण्डुसँग पुरानो हारको बदला लिने अवसर छ भने लुम्बिनीसँग अपराजित यात्रा कायम राख्ने चुनौती छ।
दुवै टोली फर्ममा रहेकाले शनिबारको भिडन्त निकै रोचक हुने अनुमान गरिएको छ।
