अमेरिकी राष्ट्रपति डोनाल्ड ट्रम्पले आफ्नो प्रशासनमा ठूलो फेरबदल गरेका छन्। उनले कडा आप्रवासन नीतिका मुख्य योजनाकार स्टिफन मिलरलाई ह्वाइट हाउसको नयाँ चिफ अफ स्टाफ नियुक्त गरेका छन्। ४१ वर्षीय मिलरले सुसी वाइल्सको स्थान लिनेछन्।
यस साताको सुरुमा भएको निर्वाचनमा डेमोक्रेटिक पार्टीले उल्लेखनीय सफलता पाएपछि वाइल्स ह्वाइट हाउस छाड्ने पहिलो उच्च अधिकारी बनेकी हुन्। ह्वाइट हाउसका एक अधिकारीका अनुसार उनले बिहीबार राति नै राजीनामा दिएकी थिइन्। मध्यावधि निर्वाचनमा रिपब्लिकन पार्टीले ठूलो हार बेहोरेपछि गरिएको यो नियुक्तिलाई प्रशासन थप आक्रामक बन्ने सङ्केतका रूपमा हेरिएको छ।
मिलर ट्रम्पका निकट र विश्वासिला सहयोगीमध्ये एक हुन्। उनले ‘अमेरिका फर्स्ट’ नीतिअनुरूप कडा आप्रवासन नीतिको पक्षमा निरन्तर वकालत गर्दै आएका छन्। नीतिसम्बन्धी उपप्रमुख तथा आन्तरिक सुरक्षा सल्लाहकारका रूपमा उनले ट्रम्पको दोस्रो कार्यकालमा अघि बढाइएको बृहत् देशनिकाला अभियानको मुख्य योजना तयार गरेका थिए।
गत जनवरीमा मिनियापोलिसमा आप्रवासन अधिकारीहरूले दुई प्रदर्शनकारीलाई गोली हानी हत्या गरेपछि मिलरको व्यापक आलोचना भएको थियो। उनले उक्त घटनामा संलग्न अधिकारीहरूको बचाउ गरेका थिए। त्यसपछि देशका विभिन्न स्थानमा विरोध प्रदर्शन भएका थिए।
मिलरको नियुक्तिप्रति डेमोक्रेटिक पार्टीका अल्पमत नेता चक शुमरले कडा आलोचना गरेका छन्। उनले मिलरलाई प्रशासनका कठोर नीतिका प्रमुख योजनाकार भन्दै डेमोक्रेटिक पार्टीले उहाँका कदमको हरेक तहमा विरोध गर्ने बताए।
नियुक्तिबारे पत्रकारको प्रश्नमा राष्ट्रपति ट्रम्पले प्रशासनमा परिवर्तन आवश्यक भएकाले यस्तो निर्णय गरेको बताए। उनले मिलरलाई उत्कृष्ट योद्धा र सुरुदेखिकै विश्वासिलो सहयोगी भन्दै प्रशंसा गरे।
यसअघि ट्रम्पले वाइल्सले उत्कृष्ट काम गरेको बताउँदै उनी अब आफ्नो राजनीतिक अभियानमा संलग्न हुने जानकारी दिएका थिए। वाइल्स ह्वाइट हाउसको चिफ अफ स्टाफ बन्ने पहिलो महिला हुन्।
वाइल्सले सामाजिक सञ्जाल एक्समार्फत ह्वाइट हाउसमा ट्रम्पको सेवा गर्न पाउनु आफ्नो जीवनकै ठूलो सम्मान भएको बताउँदै शुक्रबार आफ्नो अन्तिम कार्यदिन रहेको जानकारी दिएकी थिइन्। यसैबीच, ट्रम्पले सीबीएस न्युजको कार्यक्रम ‘६० मिनेट’ लाई दिएको अन्तर्वार्तामा प्रशासनका अन्य केही कर्मचारी पनि परिवर्तन हुन सक्ने सङ्केत गरेका छन्।
