वाशिङ्टन। अमेरिकी अर्बपति एलन मस्कले आफ्ना दुई ठूला कम्पनी स्पेसएक्स र टेस्लालाई गाभ्ने विचारलाई खुला समर्थन गरेका छन्। तर यो योजना अहिले प्रारम्भिक चरणमै रहेको र अन्तिम निर्णय नभएको उनले प्रष्ट पारेका छन्।
मस्कका अनुसार दुवै कम्पनीका स्वतन्त्र सञ्चालक सम्मिलित विशेष समितिले सम्भावित एकीकरणका विकल्पहरूको अध्ययन गरिरहेको छ। आफ्नो दोहोरो भूमिकाका कारण स्वार्थ बाझिने सम्भावना हुँदा आफू यी छलफलहरूमा सहभागी हुन नसक्ने उनले बताए। उनका भनाइमा कुनै पनि सम्झौता निश्चित छैन, र यस्तो कदमका लागि टेस्लाका सेयरधनीहरूको फराकिलो समर्थन अनिवार्य हुनेछ।
मर्जरको चर्चा भइरहेकै बेला स्पेसएक्सले वित्तीय वर्षको तेस्रो त्रैमासमा उल्लेखनीय नाफा आर्जन गरेको छ। जुलाईदेखि सेप्टेम्बरसम्म कम्पनीले ४ अर्ब ४० करोड अमेरिकी डलर खुद नाफा कमायो, जबकि अघिल्लो वर्षको सोही अवधिमा उसलाई १ अर्ब १० करोड डलर घाटा भएको थियो।
कम्पनीको कुल आम्दानी १६१ प्रतिशतले उछालिएर १४ अर्ब ६० करोड डलर पुगेको छ। कृत्रिम बौद्धिकता (एआई) सम्बन्धी सेवा र कम्प्युटिङ क्षमता भाडामा दिने सम्झौताले नाफामा ठूलो टेवा पुर्याएको कम्पनीले जनाएको छ। एआई एकाइको आम्दानी नौ गुणाले बढेर ७ अर्ब ६० करोड डलर पुगेको हो।
मस्कले सन् २०२७ भित्र थप १० गिगावाट कम्प्युटिङ क्षमता सञ्चालनमा ल्याउने लक्ष्य रहेको बताएका छन्। यता स्टारलिङ्क इन्टरनेट सेवाको आम्दानी ६९ प्रतिशतले बढेर ५ अर्ब २० करोड डलर पुगेको छ भने ग्राहक सङ्ख्या १ करोड ३६ लाख नाघेको छ।
यसैगरी मङ्गल ग्रह अभियानका लागि महत्त्वपूर्ण मानिएको स्टारसिप रकेटले पहिलो व्यावसायिक उडान सफलतापूर्वक सम्पन्न गरेको छ। उक्त उडानमार्फत २६ वटा नयाँ पुस्ताका स्टारलिङ्क उपग्रह पृथ्वीको कक्षमा पुर्याइएको कम्पनीले जानकारी दिएको छ।
