काठमाडौं । अमेरिकी राष्ट्रपति डोनाल्ड ट्रम्पले इजरायली प्रधानमन्त्री बेन्जामिन नेतान्याहुलाई टेलिफोन गरेर गाजा शान्ति योजना कार्यान्वयनमा ठोस कदम चाल्न आग्रह गरेका छन्। बिहीबारको कुराकानीमा ट्रम्पले अक्टोबर २७ को इजरायली निर्वाचनपछि रोकिएको २० बुँदे शान्ति खाकालाई अघि बढाउन दबाब दिएका हुन्।
ह्वाइट हाउसका अनुसार इजरायलमा नेतान्याहु वा उनका प्रतिद्वन्द्वी गादी आइजेनकोटमध्ये जसको नेतृत्वमा सरकार बने पनि अमेरिका उक्त योजना लागू गराउन प्रतिबद्ध छ।
करिब एक वर्षअघि ट्रम्पको २० बुँदे प्रस्तावको पहिलो चरणमा इजरायल र हमासबीच सहमति भएपछि गाजामा युद्धविराम लागू भएको थियो र जीवित रहेका अन्तिम २० बन्धक रिहा भएका थिए। त्यसपछि गठन भएको अमेरिकी ‘बोर्ड अफ पिस’ ले गाजाको पुनर्निर्माण र व्यवस्थापनमा काम गरिरहेको छ। योजनाअनुसार गाजाको नियन्त्रण नयाँ गैरराजनीतिक प्यालेस्टिनी प्राविधिक सरकार र अन्तर्राष्ट्रिय स्थिरीकरण बललाई हस्तान्तरण गरिनेछ।
गत जुलाईमा बोर्डले हमाससँग १५ बुँदे सहमति गर्दै सशस्त्र समूहको निशस्त्रीकरणमा सहमति जुटाएको थियो। गत सेप्टेम्बरमा बोर्डले २ अर्ब ४५ करोड डलरका ६६ विकास परियोजना समेटिएको छ महिने पुनर्निर्माण खाका सार्वजनिक गरेको थियो।
नेतान्याहु भने हमासले हतियार त्याग्ने विषयमा अझै शंकालु छन्। हमास गाजामा पुनः संगठित भएर हतियार जम्मा गरिरहेको उनको दाबी छ। अमेरिकी अधिकारीहरूका अनुसार निशस्त्रीकरणको प्रगति पक्का भएपछि मात्र पुनर्निर्माण चरणबद्ध रूपमा सुरु हुनेछ।
बिहीबारको वार्तामा अमेरिकी विदेशमन्त्री मार्को रुबियो, ट्रम्पका सल्लाहकार ज्यारेड कुश्नर र अमेरिकी दूत स्टिभ विटकफ सहभागी थिए। गाजासँगै इरानसँगको युद्धबारे पनि छलफल भएको बताइएको छ। वार्तापछि बोर्डका सदस्य एवं बेलायतका पूर्वप्रधानमन्त्री टोनी ब्लेयरले इजरायल पुगेर नेतान्याहु र सरकार गठनको जिम्मेवारी पाएका आइजेनकोटसँग छुट्टाछुट्टै भेट गरेका छन्।
