काठमाडौं । नेपाल वायुसेवा निगमले चार वटा जहाज खरिद गर्न लिएको ऋण साँवा र ब्याजसहित ५५ अर्ब ९२ करोड रुपैयाँ पुगेको छ । सुरुमा ३४ अर्ब रुपैयाँ बराबर रहेको उक्त ऋण वर्षौंदेखि तिर्न नसक्दा बढ्दै गएको हो ।
महालेखा नियन्त्रक कार्यालयको तथ्यांकअनुसार गत आर्थिक वर्ष २०८२/८३ को अन्त्यसम्म ऋणको साँवा मात्रै ४४ अर्ब ६८ करोड रुपैयाँ पुगेको छ भने त्यसमा लागेको ब्याज ११ अर्ब २४ करोड रुपैयाँ रहेको छ । यी दुवै जोड्दा निगमले अब तिर्नुपर्ने कुल रकम ५५ अर्ब ९२ करोड रुपैयाँ हुन आउँछ ।
दुई वटा वाइड बडी र दुई वटा न्यारोबडी जहाज किन्ने प्रयोजनका लागि यो ऋण लिइएको थियो । नेपाल सरकारले जमानत बसेपछि कर्मचारी सञ्चय कोष र नागरिक लगानी कोषले निगमलाई ऋण दिएका थिए । वाइड बडी जहाज किन्न सञ्चय कोषले १२ अर्ब रुपैयाँ र नागरिक लगानी कोषले १२ अर्ब रुपैयाँ दिएका थिए । त्यसअघि न्यारोबडी जहाज किन्न सञ्चय कोषले नै १० अर्ब रुपैयाँ ऋण दिएको थियो ।
ऋण बढ्दै जाँदा निगमको वित्तीय भार झन् गह्रुँगो बन्दै गएको छ । जहाज खरिदका लागि लिइएको ऋणको किस्ता र ब्याज समयमै तिर्न नसक्दा बक्यौता निरन्तर बढिरहेको देखिन्छ ।
