ठेलामा मम र चाउमिन बेचेर व्यवसाय सुरु गरेका कमलजंग कुँवरले बुटवलमा ६ करोड रुपैयाँ लगानीमा ‘ड्याडिज केक–द प्रिमियम बेकरी’ सञ्चालनमा ल्याएका छन्। अर्घाखाँचीमा जन्मिएका ३७ वर्षीय कुँवरले एक दशकमा झन्डै ३० वटा आउटलेट भएको रेस्टुरेन्ट चेन खडा गरिसकेका छन्।
फ्रेन्च बेकरी परम्परा र आधुनिक इटालियन उपकरणको संयोजनमा तयार हुने यहाँका उत्पादनमा गुणस्तरीय कच्चापदार्थ प्रयोग गरिने कुँवरले बताएका छन्। फ्रान्सबाट झिकाइएका नेपाली सेफ नवाङ शेर्पाका अनुसार उत्पादनमा टी ४५ र टी ५५ ग्रेडको पिठो प्रयोग हुन्छ भने बटर चाहिने परिकारमा वास्तविक बटरलाई प्राथमिकता दिइन्छ। कृत्रिम रङ र अनावश्यक सामग्री प्रयोग नगर्ने नीति रहेको सेफ शेर्पाले बताए।
बेकरीमा आर्टिजन ब्रेड, फ्रेन्च पेस्ट्री, केक, कुकिज, चिज केक तथा विशेष कफी र पेय पदार्थ उपलब्ध छन्। आर्टिजन ब्रेड २४ घण्टाभित्र खपत हुने गरी उत्पादन गरिन्छ।
कम्पनीले एक वर्षभित्र रुपन्देहीका विभिन्न स्थानमा १८ वटा मिनी आउटलेट खोल्ने लक्ष्य राखेको छ। पोखरामा नयाँ आउटलेटको काम अगाडि बढिरहेको छ भने काठमाडौंमा विस्तारको तयारी भइरहेको छ। हाल ६० जनाले प्रत्यक्ष रोजगारी पाएकामा भविष्यमा यो संख्या ५ सय पुर्याउने योजना छ। निकट भविष्यमा चौबिसै घण्टा सेवा दिने योजना पनि छ।
ड्याडिज समूह अन्तर्गत यसअघि ड्याडिज किचन, ड्याडिज एक्स्प्रेस, ड्याडिज होटल तथा ड्याडिज हिल्स सञ्चालनमा छन्। समूहले अटोमोबाइल, शिक्षा, घरजग्गा तथा मोबाइल र इलेक्ट्रोनिक उपकरण वितरण व्यवसाय पनि चलाइरहेको छ। दुई वर्षअघि ‘४० वर्षमुनिका ४० युवा’ मा छनोट भएका कुँवर युवा उद्यमशीलतासम्बन्धी कार्यक्रममा उत्प्रेरक वक्ताका रूपमा निम्त्याइने गर्छन्।
