खोटाङको दिप्रुङ चुइचुम्मा गाउँपालिका–७ टेम्मामा बस्दै आएकी १५ महिने रियाना दाहालको जिल्ला अस्पताल दिक्तेलमा उपचार गराइरहेकै क्रममा ज्यान गएको छ।
अधिक ज्वरो आएपछि गत कात्तिक ४ गते बिहान परिवारले उनलाई अस्पताल पुर्याएको थियो। जाँचका क्रममा उनलाई डेंगु देखिएको थियो। त्यसपछि श्वासप्रश्वासमा गम्भीर समस्या थपिएपछि उनको स्वास्थ्य अवस्था झनै जटिल बनेको जिल्ला अस्पताल खोटाङका निमित्त मेडिकल सुपरिटेन्डेन्ट डा. पुष्कल राईले बताए।
अवस्था बिग्रँदै गएपछि चिकित्सकहरूले उनलाई बिहान करिब ३ बजे थप उपचारका लागि रेफर गरेका थिए। तर दशैंको चहलपहलका कारण गाडी भेट्नै परिवारलाई निकै हम्मेहम्मे परेको थियो। गाडी खोजेर अन्यत्र लैजाने तयारी चलिरहँदा नै बालिकाको प्राण गइसकेको थियो।
घटनाबारे जानकारी दिँदै जिल्ला प्रहरी कार्यालय खोटाङका डिएसपी प्रकाश बुढाथोकीले शिशुको ज्यान गएको पुष्टि गरेका छन्।
