काठमाडौं । चिकित्सा शिक्षा आयोगको २८औँ बैठकले चिकित्सा शिक्षाका विभिन्न कार्यक्रमतर्फ ४१८ सिट थप गर्ने निर्णय गरेको छ ।प्रधानमन्त्री बालेन शाहको अध्यक्षतामा बसेको बैठकले शैक्षिक सत्र २०८३/८४ का लागि ८४ वटा शिक्षण संस्थामा विभिन्न तह र विषयका गरी कुल ९ हजार ६९१ सिट निर्धारण गरेको आयोग स्रोतले जनाएको छ ।यस वर्ष एमबीबीएसमा मात्रै ११० सिट थप गरिएको छ । कैलालीको गेटास्थित सहिद दशरथ चन्द स्वास्थ्य विज्ञान विश्वविद्यालयले पहिलोपटक एमबीबीएस अध्ययनका लागि ५० सिट पाएको छ । धरानस्थित बीपी कोइराला स्वास्थ्य विज्ञान प्रतिष्ठान र नेपाली सेना स्वास्थ्य विज्ञान प्रतिष्ठानमा ३०/३० सिट थपिएको छ ।बीएस्सी नर्सिङ कार्यक्रममा २१० र बीएमएस कार्यक्रममा ९८ सिट वृद्धि गरिएको छ ।सिट निर्धारणमा सरकारी शिक्षण संस्थाको क्षमता विस्तारलाई प्राथमिकता दिइएको छ । निजी मेडिकल कलेजहरूको सिट संख्या भने यथावत् राखिएको आयोग स्रोतले जनाएको छ ।यस वर्ष ९० वटा शिक्षण संस्थाले स्वमूल्यांकन फारम भरेर आवेदन दिएका थिए । अनुगमन प्रतिवेदनका आधारमा ८४ वटा संस्थाको सिट निर्धारण गरिएको हो ।