काभ्रेपलाञ्चोकका दुई नगरपालिकाले सरकारी, सार्वजनिक र वन क्षेत्रको जग्गा अतिक्रमण रोक्न सीमा छुट्याउने काम अघि बढाएका छन्। नमोबुद्ध र मण्डनदेउपुर नगरपालिकाले छुट्टाछुट्टै रूपमा नापजाँच र सीमाङ्कन सुरु गरेका हुन्। पछिल्ला वर्षहरूमा सार्वजनिक जग्गा मिचिने क्रम बढेको गुनासो आएपछि दुवै पालिकाले यो कदम चालेका हुन्।
नमोबुद्ध नगरपालिकाले वडा नम्बर ३ र ४ का सामुदायिक वनभित्र भएको अतिक्रमण नियन्त्रण गर्न छ सदस्यीय अनुगमन समिति बनाएको छ। नगर उपप्रमुख रत्न लामाको संयोजकत्वमा बनेको समितिले चार महिनाभित्र जग्गाको नापजाँच, रेखाङ्कन र स्थायी पिलर राखेर सीमा छुट्याउने काम सक्नेछ। नगरप्रमुख कुन्साङ लामाका अनुसार सार्वजनिक तथा वन क्षेत्र मिचिएको भन्ने उजुरी आएपछि प्रक्रिया सुरु गरिएको हो। जानाजानी जग्गा मिचेको पुष्टि भएमा कानुनी प्रक्रिया पूरा गरेर जग्गा खाली गराइने र मिच्नेलाई कारबाही गरिने उनले बताए।
मण्डनदेउपुर नगरपालिकाले भने नगरकोट, नाल्दुम र ठूलीचौर क्षेत्रमा सीमाङ्कन गरिसकेको छ। नापी कार्यालयको प्राविधिक सहयोगमा गरिएको पहिलो चरणको काममा ४८ भन्दा बढी जग्गाधनी तथा सरकारी र सार्वजनिक जग्गाको सीमा यकिन गरिएको छ। नापी टोलीले आधुनिक जिपिएस प्रविधि प्रयोग गरी अहिलेको भोगचलन, घर, बाटो र कम्पाउण्डको डिजिटल नापजाँच गरेको छ। २०३२ सालको नापी नक्सालाई आधार मानेर सीमा निर्धारण गरिएको हो। नगरकोट क्षेत्रमा अनियन्त्रित रूपमा भौतिक संरचना बन्ने र जग्गा मिचिने क्रम रोक्न यो काम गरिएको नगरपालिकाले जनाएको छ।
