सर्वोच्च अदालतका न्यायाधीश हरि फुयालले न्यायिक क्षेत्रमा भइरहेको अनुसन्धानमा आफ्नो पूरा सहयोग रहने बताएका छन्। बिहीबार साँझ सार्वजनिक गरेको वक्तव्यमा उनले आफ्नो कुनै पनि कामबाट न्यायपालिकाको गरिमामा क्षति नपुगेको दाबी गरेका छन्।
वक्तव्यमा फुयालले न्यायपालिका र आफूबारे सार्वजनिक भएका विवरण तथा समाचारप्रति आफ्नो गम्भीर ध्यान गएको उल्लेख गरेका छन्। स्वतन्त्र, निष्पक्ष र सुशासनयुक्त न्यायपालिकाप्रति आफू पूर्ण रूपमा प्रतिबद्ध रहेको र न्यायिक विचलनका विषयमा चलिरहेको महत्वपूर्ण अनुसन्धानप्रति समर्थन र सहयोग रहने उनले बताएका छन्।
पछिल्लो समय न्यायक्षेत्रमा देखिएको अस्थिरता, असुरक्षा र विसङ्गतिको फाइदा उठाएर भएका कामबारे राज्य जानकार रहेको र त्यसबारे अनुसन्धान भइरहेको पनि वक्तव्यमा उल्लेख छ। आफूबारे आएका तथ्य र समाचारलाई देश र न्यायक्षेत्रको अस्थिरता तथा असुरक्षाभन्दा बाहिरबाट नहेर्न उनले न्यायक्षेत्रका निकाय, व्यक्ति, सरोकारवाला र सञ्चारमाध्यमलाई अनुरोध गरेका छन्।
आफूबाट न्यायिक विचलन वा न्यायपालिकाको प्रतिष्ठामा आँच पुग्ने कुनै काम नभएको फुयालको भनाइ छ। आफूप्रति सिर्जना गरिएको भ्रम, अर्धसत्य र चलिरहेको अनुसन्धानलाई असर पार्ने गरी भएका कामप्रति उनले दुःख व्यक्त गरेका छन्। सबै न्यायकर्मीलाई न्यायपालिकाप्रतिको भरोसा अझ बलियो बनाउन उनले आग्रह गरेका छन्।
बिचौलिया इमन सापकोटासँगको सम्पर्क र सम्बन्धका विषयमा आफूबारे समाचार आइरहेका बेला उनको यो वक्तव्य आएको हो।
