काठमाडौं । त्रिभुवन विश्वविद्यालयले दीक्षान्त समारोह पहिलोपटक सातै प्रदेशमा गर्ने भएको छ । काठमाडौंमा मात्र हुँदै आएको समारोहलाई विद्यार्थीको सहजताका लागि प्रदेश तहमा विस्तार गर्न लागिएको हो ।उपकुलपति प्रा.डा. भोला थापाका अनुसार त्रिविका पदाधिकारी प्रदेश–प्रदेशमा पुगेर छलफल गरिरहेका छन् । ‘हिजोमात्र सुदूरपश्चिमको धनगढीबाट फर्किएका छौँ,’ उनले भने ।२०८३ साल पुसमा काठमाडौंमा मूल दीक्षान्त समारोह आयोजना हुनेछ । त्यसपछि प्रदेश–प्रदेशमा फरक–फरक समयमा समारोह हुनेछ, तर मिति तय हुन बाँकी छ ।क्षेत्रीय परीक्षा नियन्त्रण कार्यालयलाई प्रादेशिक संरचनामा परिवर्तन गरी उक्त कार्यालयले प्रदेशको दीक्षान्त समारोहको तयारी गर्नेछ । प्रादेशिक कार्यालय प्रमुखको संयोजकत्वमा आंगिक, सामुदायिक र सम्बन्धन प्राप्त निजी क्याम्पसका प्रमुख तथा कर्मचारी रहने समितिले तयारी गर्नेछ ।दीक्षान्त समारोह प्रदेश–प्रदेशमा हुने भएपछि विद्यार्थी र सरोकारवाला उत्साहित भएका छन् । अहिले विद्यार्थीको आवेदन कम आए पनि अन्तिम समयमा बढ्ने अपेक्षा गरिएको थापाले बताए ।यस वर्ष त्रिविबाट ९५ हजार ५४० विद्यार्थी दीक्षित हुँदै छन् । व्यवस्थापन संकायबाट सबैभन्दा धेरै ४३ हजार १४२, शिक्षाशास्त्रबाट १९ हजार ५३३, मानविकी तथा सामाजिकशास्त्रबाट १५ हजार ४४१ विद्यार्थी दीक्षित हुँदैछन् ।