काठमाडौं । काठमाडौं महानगरपालिकाले साँघुरा गल्ली र अत्यधिक सवारी चापका कारण बिरामीसम्म एम्बुलेन्स पुग्न कठिन हुने समस्या समाधान गर्न बाइक एम्बुलेन्स सेवा सुरु गरेको छ ।महानगरपालिकाकी कार्यवाहक प्रमुख सुनिता डंगोलले शुक्रबारदेखि सेवा सञ्चालनमा ल्याइएको जानकारी दिइन् । उनका अनुसार चारपाङ्ग्रे एम्बुलेन्स पुग्न कठिन हुने र ट्राफिक जामका कारण ढिलाइ हुने स्थानमा बाइक एम्बुलेन्स उपयोगी हुनेछ ।’काठमाडौंमा पर्याप्त एम्बुलेन्स छन्, तर समयमा सेवा दिन सकिएको छैन । ट्राफिक जामका कारण धेरैपटक एम्बुलेन्स समयमै पुग्न सक्दैन,’ डंगोलले भनिन् ।महानगरपालिकाले नेपाल एम्बुलेन्स सेवासँगको सहकार्यमा १०२ नम्बरको निःशुल्क एम्बुलेन्स सेवा पनि सञ्चालन गर्दै आएको छ । यो सेवा काठमाडौं महानगरमा मात्र सीमित नराखी उपत्यकाका अन्य स्थानीय तहमा समेत विस्तार गरिएको छ । बाढीका बेला पनि १०२ नम्बरको सेवाले उद्धारमा सहयोग पुगेको थियो ।महानगरले अस्पताल तथा स्वास्थ्य संस्थालाई पूर्वाधार, उपकरण र प्रत्यक्ष स्वास्थ्य सेवाका लागि अनुदान दिँदै आएको छ । कीर्तिपुरमा आर्थिक अभावका कारण जलनका बिरामी उपचारबाट वञ्चित नहोऊन् भनेर कोष स्थापना गरी उपचार खर्च व्यहोर्ने व्यवस्था गरिएको छ ।