काठमाडौं — प्रधानमन्त्री बालेन शाहले नेपालमा गेमिङ र सूचना प्रविधि क्षेत्रलाई उद्योगका रूपमा अघि बढाउन नीतिगत समीक्षा र आवश्यक तयारी थालिएको बताएका छन्। सामाजिक सञ्जालमार्फत उनले नेपाली युवाले बनाएका गेमिङ एपहरूले विश्वभर पहिचान बनाइरहेको उल्लेख गर्दै यस क्षेत्रमा देखिएका समस्या समाधान गर्न सरकारले काम गरिरहेको जानकारी दिए।
प्रधानमन्त्री शाहले संसारभर लोकप्रिय बनेका लुडो र कलब्रेक खेल नेपालीले नै विकास गरेको स्मरण गराए। लुडो करिब २० करोड पटक डाउनलोड भएको छ भने कलब्रेक १५ करोडभन्दा बढी पटक डाउनलोड भइसकेको छ। सयौँ युवाहरू अहिले पनि खेल विकासमा सक्रिय रहेको उनको भनाइ छ। उनले गेमिङ विकासकर्ताहरूसँग भेटेर उनीहरूले भोगिरहेका समस्या र चुनौतीबारे छलफल गरेको समेत बताए।
नेपालबाटै विश्वस्तरीय कम्पनीहरू जन्माउने वातावरण बनाउने प्रतिबद्धता जनाउँदै प्रधानमन्त्रीले सूचना प्रविधि उत्पादन र निर्यातको सम्भावनालाई ध्यानमा राखेर कम्पनीहरूले सहजै आम्दानी गर्न र फेरि लगानी गर्न सक्ने गरी कर प्रणालीमा सहजता र नीतिगत सुधार गरिने बताए। अन्तर्राष्ट्रिय आम्दानीसँग जोडिएका कडा र परम्परागत नियमहरूलाई पनि खुकुलो पारिने उनको भनाइ छ।
गेमिङ र समग्र सूचना प्रविधि क्षेत्रलाई अघि बढाउन गेम ज्याम, स्टार्टअप कार्यक्रम र ह्याकाथनजस्ता कार्यक्रममा लगानी गरिने छ। सूचना प्रविधि क्षेत्र, नेपाल राष्ट्र बैंक र अर्थ मन्त्रालयबीच नियमित छलफलको वातावरण मिलाइने प्रधानमन्त्री शाहले बताए। नेपालको सूचना प्रविधि तथा गेमिङ क्षेत्र अहिले निकै आशाजनक अवस्थामा रहेको र नेपाली प्रतिभालाई विश्व बजारमा स्थापित गराउन सरकारले पूर्ण सहयोग गर्ने उनले बताएका छन्।
