अमेरिकामा आज मध्यावधि निर्वाचन हुँदैछ। राष्ट्रपति डोनाल्ड ट्रम्पको दोस्रो कार्यकालको आधा अवधि पूरा हुन लाग्दा हुन लागेको यो निर्वाचनलाई उनको प्रशासनप्रतिको जनमत परीक्षणका रूपमा हेरिएको छ।
यस निर्वाचनबाट अमेरिकी संसद् कंग्रेसका दुवै सदनको शक्ति सन्तुलन निर्धारण हुनेछ। प्रतिनिधिसभाका सबै ४३५ सिटका लागि मतदान हुँदैछ भने सिनेटका १०० मध्ये ३५ सिटका लागि पनि मतदान हुनेछ। सिनेटमा ३३ नियमित सिटसँगै दुई विशेष निर्वाचन पनि हुँदैछन्। त्यस्तै, ३६ राज्यमा गभर्नर चयनका लागि समेत मतदान हुनेछ।
हाल रिपब्लिकन पार्टीको प्रतिनिधिसभा र सिनेट दुवैमा बहुमत छ। प्रतिनिधिसभामा रिपब्लिकनको बहुमत साँघुरो रहेकाले केही निर्वाचन क्षेत्रको नतिजाले पनि सदनको शक्ति सन्तुलन बदल्न सक्छ। सिनेटमा बहुमत हासिल गर्न डेमोक्र्याटिक पार्टीले चार सिटको खुद वृद्धि गर्नुपर्ने अवस्था छ।
मध्यावधि निर्वाचनमा सत्तारूढ राष्ट्रपतिको दलले संसदमा बहुमत गुमाउने सम्भावना रहने भएकाले यसलाई राष्ट्रपतिको कार्यसम्पादनप्रतिको जनमत परीक्षण मान्ने गरिन्छ। यदि डेमोक्र्याटहरूले प्रतिनिधिसभामा बहुमत हासिल गरे भने ट्रम्प प्रशासनका निर्णयमाथि संसदीय निगरानी र अनुसन्धान बढ्न सक्छ। रिपब्लिकनले बहुमत कायम राखेमा भने ट्रम्पलाई आफ्नो नीतिगत एजेन्डा अघि बढाउन सहज हुनेछ।
रोयटर्सका अनुसार यसपटकको निर्वाचनमा जीवनयापनको लागत, आर्थिक अवस्था, इरानसँगको युद्ध र ट्रम्प प्रशासनका नीतिहरू मतदाताका प्रमुख चासोका विषय बनेका छन्। निर्वाचनको नतिजाले सन् २०२८ मा हुने अमेरिकी राष्ट्रपतीय निर्वाचनअघि दुवै दलको राजनीतिक रणनीति र शक्ति सन्तुलनमा समेत प्रभाव पार्नेछ।
