दिल्लीको अदालतले चर्चित भारतीय युट्युबर ध्रुव राठीविरुद्ध जमानती पक्राउ पुर्जी जारी गरेको छ। सन् २०१८ को मानहानि मुद्दासँग सम्बन्धित उक्त आदेश शुक्रबार जारी भएको हो।समाचार एजेन्सी पीटीआईका अनुसार मुद्दाको जड राठीले सन् २०१८ को मे महिनामा सामाजिक सञ्जालमा सार्वजनिक गरेको एउटा भिडियो हो। उक्त भिडियोमा राठीले भारतीय जनता पार्टीको आईटी सेलले आफ्नो प्रतिष्ठामा आँच पुर्‍याउन एक व्यक्तिलाई आर्थिक प्रलोभन दिन खोजेको आरोप लगाएका थिए। त्यसबेला दिल्लीका तत्कालीन मुख्यमन्त्री अरविन्द केजरीवालले उक्त भिडियो रिट्विट गरेका थिए।भिडियो बाहिरिएपछि विकास सांकृत्यायन (विकास पाण्डे) ले आफू र आफ्नो पार्टीको मानप्रतिष्ठामा ठेस पुगेको भन्दै राठी र केजरीवालविरुद्ध मानहानिको उजुरी दर्ता गरेका थिए।यसअघि गत अक्टोबर १२ मा साकेत अदालतका न्यायिक मजिस्ट्रेट राहुल जैनले राठीका नाममा नयाँ समन जारी गर्ने आदेश दिएका थिए। मुद्दा सुरु भएदेखि नै म्याद तामेल गर्ने पटक–पटकको प्रयास असफल भएको थियो। वादीका अधिवक्ता शर्माले राठी लामो समयदेखि विदेशमा बस्दै आएकोले म्याद बुझाउन नसकिएको अदालतलाई जानकारी गराए। अहिले उनी भारतमै रहेको र हरियाणाको गुरुग्राममा बसोबास गरिरहेको जानकारी पाएपछि अदालतले जमानती पुर्जी जारी गरेको हो।