नेपाल प्रिमियर लिगमा आज सोमबार दुई खेल हुँदैछन्। कीर्तिपुरस्थित त्रिभुवन विश्वविद्यालय क्रिकेट मैदानमा हुने पहिलो खेल दिउँसो साढे १२ बजे काठमाडौँ गोर्खाज र कर्णाली याक्सबीच हुनेछ भने साँझ ५ बजे सुदूरपश्चिम रोयल्स र चितवन राइनोज आमनेसामने हुनेछन्।
काठमाडौँ अहिलेसम्म जितको खाता खोल्न सकेको छैन। पहिलो खेल गुमाएको गोर्खाज आज दोस्रो खेलमा पहिलो जितको खोजीमा मैदान उत्रनेछ। अर्कोतर्फ कर्णाली भने उत्कृष्ट लयमा छ — याक्सले खेलेका दुवै खेल जितेर चार अङ्क बटुलेको छ र आज तेस्रो जित हात पार्ने लक्ष्यसहित मैदानमा उत्रनेछ।
दोस्रो खेलमा सुदूरपश्चिममाथि दबाब बढी छ। रोयल्सले तीन खेल खेल्दा एउटामा मात्र जित निकालेको छ भने दुई खेलमा पराजित भएको छ। चौथो खेलमा जित्नै पर्ने अवस्थामा रहेको सुदूरपश्चिमका लागि आजको खेल निकै महत्वपूर्ण छ।
चितवन भने अहिलेसम्म अपराजित छ। राइनोजले दुई खेलमा एक जित निकालेको छ भने अर्को खेल वर्षाका कारण स्थगित भएपछि दुवै टिमले एक-एक अङ्क बाँडेका थिए।
