नेपाली बजारमा भर्खरै भित्रिएको विद्युतीय गाडी बी०३एक्स ग्राहकको हातमा पुग्न थालेको छ। वितरक कम्पनीले प्रारम्भिक बुकिङ गरेका ग्राहकलाई गाडी हस्तान्तरण गर्न सुरु गरेको हो।
काठमाडौंमा सडक परीक्षण र औपचारिक सार्वजनिकीकरणपछि पहिलो समूहका ग्राहकले गाडी बुझिसकेका छन्। नेपालका लागि लिपमोटरको आधिकारिक वितरक सांग्रिला मोटर्स प्रालिले बुकिङ गरेका सबै ग्राहकलाई छिटो र सहज रूपमा गाडी उपलब्ध गराउने जनाएको छ। कम्पनीका निर्देशक हेमन्त गोल्छाले ग्राहकबाट उत्साहजनक प्रतिक्रिया पाएको बताए।
बी०३एक्समा १४५ किलोवाट क्षमताको मोटर र ५३ किलोवाट आवरको ब्याट्री जडान गरिएको छ। गाडीको ग्राउन्ड क्लियरेन्स १९० मिलिमिटर छ। कम्पनीका अनुसार एकपटकको चार्जमा सीएलटीसी मापदण्डअनुसार यो गाडीले ५०५ किलोमिटरसम्म यात्रा गर्न सक्छ। ब्याट्री ३० देखि ८० प्रतिशतसम्म चार्ज गर्न १६ मिनेट लाग्ने दाबी गरिएको छ।
गाडीभित्र १४.६ इन्चको टचस्क्रिन, १२ वटा स्पिकर भएको साउन्ड सिस्टम र लेभल २ एडीएएस सुरक्षा प्रविधि छ। बुट स्पेस ५१० लिटर रहेकोमा पछाडिको सिट फोल्ड गर्दा १ हजार ६०५ लिटरसम्म विस्तार गर्न सकिन्छ।
नेपालमा विद्युतीय गाडीप्रतिको चासो बढ्दै गएका बेला नयाँ मोडलको डेलिभरी सुरु हुनुले बजारमा थप प्रतिस्पर्धा ल्याउने अपेक्षा गरिएको छ।
