काठमाडौं । देशभर दशैं–तिहारको उल्लास छाइरहेको बेला त्रिभुवन अन्तर्राष्ट्रिय विमानस्थलमा दुईथरि भीड देखिएको छ — एकातिर चाडपर्वका लागि घर फर्किएका परदेशीको स्वागतमा उभिएका परिवार, अर्कातिर रोजगारीका लागि विदेश लाग्न लागेका नेपाली र उनीहरूलाई बिदाइ गर्न आएका आफन्त ।
रोजगारीका लागि टर्की जान लागेका महेन्द्रनगरका नवीन सिंहले घरबाट निस्कँदा विमानस्थलमा आफन्तबाट टीका लगाए । ‘दसैं–तिहारको बेला परदेशमा हुनुपर्दा दु:ख त लाग्छ नि, तर के गर्ने, बाध्यता छ, अरू विकल्प छैन,’ उनले भने । देशमै अवसर नबनेको भन्दै उनले तत्काल परिवर्तन हुने आशा नभएको बताए — ‘नेपालमा अहिले धेरै व्यवसाय बन्द भइरहेका छन्, चल्न सकेका छैनन् । यति छिट्टै सबै परिवर्तन हुन्छ जस्तो लाग्दैन, त्यसैले अन्तिम विकल्प नै विदेश जाने भएको छ ।’
अमेरिका जान लागेकी बुहारी युवावती ओलीलाई बिदाइ गर्न आएको परिवारको अनुहारमा खुसी र पीडा दुवै थियो । श्रीमान् पहिल्यै उतै भएकाले बुहारीलाई पठाउनुपर्ने अवस्था बनेको उनका ससुराले सुनाए — ‘दु:ख त अनिवार्य नै छ, तर यहाँ बसेर पनि हुँदैन भन्ने भयो । छोरो उतै भएकाले बुहारीलाई पनि पठाउनुपर्ने अवस्था देखियो ।’
दुई महिनाको बिदा सकिएपछि काममा फर्किनैपर्ने भएका धनुषाका भोगी महतो पनि दुबई जान लागेका थिए । टिकट सार्न खोज्दा थप रकम मागिएपछि निर्धारित उडानमै फर्किनुपरेको उनले बताए । दुबईमा भवन निर्माणको काम गर्ने महतो सन् २०१२ मा पहिलोपटक विदेश गएका थिए ; कोभिडका बेला कम्पनी बन्द भएपछि फर्किएका उनी सन् २०२४ मा पुन: परदेशिए । ‘धेरै ऋण पनि छ, ऋण तिर्नुपर्यो नि । त्यही कारणले जानुपरेको हो,’ उनले भने ।
अराइभल कक्षमा भने विदेशबाट फर्किने आफन्तको प्रतीक्षामा बसेका परिवार भेटिए । परदेशबाट कमाएको रकमले घरको खर्च धान्ने जिम्मेवारीसँगै दशैंमा परिवारसँग भेला हुने रहरले उनीहरूलाई घर फर्काएको थियो ।
