यमनको सीमा नजिकै साउदी अरबको एउटा टोही हेलिकप्टर दुर्घटनाग्रस्त हुँदा त्यसमा सवार दुवै चालकको मृत्यु भएको छ । साउदी नेतृत्वको सैन्य गठबन्धनले प्राविधिक खराबीका कारण घटना भएको जनाएको छ ।
गठबन्धनका प्रवक्ता तुर्की अल–मालिकीले आइतबार जारी विज्ञप्तिमा यमन सीमा नजिक गस्तीमा रहेको आफ्नो एउटा टोही हेलिकप्टर दुर्घटनामा परेको पुष्टि गरेका छन् । बीबीसी न्युज अरेबिकका अनुसार प्राविधिक गडबडी नै दुर्घटनाको कारण रहेको गठबन्धनले बताएको हो ।
हुथी विद्रोहीसँग तनाव बढेयता साउदी अरबले सैन्य जनशक्ति गुमाएको सार्वजनिक गरेको यो पहिलो घटना हो । पछिल्ला सातामा रातो सागर र यमन सीमामा तनाव निरन्तर बढ्दो छ ।
उता, हुथीहरूसँग सम्बद्ध यमनी सशस्त्र बलका प्रवक्ता याह्या सरीले भने साउदी निर्मित ‘करियाल’ प्रकारको सशस्त्र टोही विमान आफूहरूले खसालेको दाबी गरेका छन् । उनका अनुसार तनाव बढेयता यस्तो विमान खसालिएको यो चौथो घटना हो ।
यसैबीच, आइतबार बिहान रियादका बासिन्दाले फोनमा हवाई खतरासम्बन्धी आपत्कालीन चेतावनी पाएका थिए । समाचार संस्था एएफपीका अनुसार अधिकारीहरूले केही मिनेटमै उक्त चेतावनी हटाएका थिए ।
